Ayera minister di Asunto Social y Labor, Glenbert Croes a anuncia cu e ayudo social di FASE (Fondo di Asistencia Social di Emergencia) a wordo extendi cu tres luna mas te cu september. Tambe cu mas hende nobo lo ricibi ayudo di e programa aki y cu e siman aki ya caba algun pago ta tumando luga. E ta kere cu e noticia aki ta trece un gran alivio den comunidad.
Igualmente el a laga sa cu un grupo di 866 persona nobo lo ricibi pago di FASE den e di tres transferencia cu ta ser paga na final di juni. Tambe desde diahuebs ultimo tin un serie di pago cu ta tumando luga durante e dianan aki. Unabes cu nan por a resolve problemanan presenta den nan sistema.
Alrededor di 1,115 persona ta ripiti ayudo di FASE. Tambe 400 hende cu a bay pa subsidio di salario a bin bek pa FASE. Tin hendenan cu mirando e fecha di nan aplicacion nan ta ricibi e prome pago di FASE. E caso aki ta relaciona cu empresarionan chikito sin personal cu no tabata cay den FASE, pero despues a dicidi cu si. Otro siman e mandatario a priminti cu lo bin cu informacion mas extenso.
Nan a introduci un sistema cu den caso cu si bo compania a pidi subsidio di salario y bo no ta hayando FASE, y tampoco bo compania no a paga bo subsidio di salario, ta importante pa bo tuma contacto cu Banco di Seguro Social (SVb). Ta asina cu via nan e-mail adres bo por informa SVb cu bo subsidio di salario no ta wordo paga. Nan por controla e situacion aki, ya cu nan ta coopera estrechamente cu SVb. Tambe nan ta reactiva bo FASE, kiermen bo no mester aplica mas di un biaha.
Croes a splica cu pa medio di bo registro original di FASE, a base di e mesun number ey, bo ta wordo reactiva. E mesun number ta conta pa extension di fase tambe, sin mester registra di nobo. Sinembargo si bo situacion laboral ta cambia y bo ta haya un trabao, ta keda bo deber pa notifica FASE pa otro beneficia di dje. Si bo ta yega cobra salario y FASE hunto, esaki lo wordo controla debidamente, y nan ta bay cobra bo bek.
El mandatario a referi cu FASE tin un necesidad pa su existencia pa tur ciudadano cu a perde un trabao por ricibi e ayudo aki. Segun nan cifra alrededor di 10 mil lo ricibi pago di FASE. E ta inclui ciudadanonan cu a perde nan trabao y comerciantenan independiente.
