(AP) — Si liga di futbol Aleman a pensa cu a caba cu protesta di fanatico contra inversionista externo, ayera a resulta di ta fout. Tanto Borussia Dortmund y Eintracht Frankfurt su sostenedornan a desplega borchi durante e weganan respectivo di nan team den sosten di e regla 50-plus-1 di futbol Aleman, cu ta limite con hopi influencia un inversionista stranhero por tin riba un club. E regla ta bisa cu miembronan di club mester retene control di derecho di votacion – al menos 50% y un voto.
“50-plus-1 ta e fundacion di nos sport. Futbol ta biba door di su fanaticonan!” e sostenedornan di Dortmund a bisa riba borchi durante e perdida 3-2 di nan team contra Hoffenheim.
E fanaticonan di Frankfurt brevemente a interumpi e partido di nan banda contra Wolfsburg door di tira bala chikito di plastic riba e cancha tras di un di e porterianan na comienso di segundo mita. Al menos un porco chikito di plastic tambe a keda tira, cu a cay tras un di e porteria.
E fanaticonan tambe a sostene un borchi grandi criticando Wolfsburg, sosteni pa Volkswagen cu un insulto, bisando cu e “club inversionista” mester keda exclui for di federacion di futbol Aleman pasobra e no ta adheri na e regla di 50-plus-1.
A stop e wega rond di seis minuut mientras tabata retira e obhetonan prome cu por a reanuda e wega cu Wolfsburg liderando 2-1. Omar Marmoush a bay pa anota den tempo extra pa logra un empate 2-2 pa Frankfurt.
E protesta diadomingo a yega a pesar di e decision di liga Aleman den mita di siman pa stop su plan controversial pa bende e derechonan di media di e clubnan den futuro na un inversionista externo pa un pago adelanta.
Sostenedornan di Frankfurt tabata expresando obhecion na e status di Wolfsburg compara cu esun di nan, unda fanaticonan tin mayoria den con ta maneha e club.
Club multi-sport VfL Wolfsburg a keda funda na 1945, apenas siete aña despues cu trahadornan di fabrica di Volkswagen a funda e ciudad di Wolfburg mes. Wolfburg ainda ta sosteni pa e fabricante di auto Aleman, un di e unico excepcion na e regla di 50-plus-1.
Bayer Leverkusen ta e otro excepcion, ya cu e tabata funda pa trahadornan di fabrica Bayer. E gigante farmaceutico ainda ta doño di e club. Tanto Wolfsburg y Leverkusen tin exencion di 50-plus-1 pa motibo cu nan tin e mesun sostenedornan pa mas cu 20 aña.
Plan di e liga pa trece un inversionista externo pa un accion di derecho di media a conduci na protesta extensivo na e dos division top Aleman durante ultimo dos weekend. No ta spera mas protesta despues cu a bandona e idea diaranson.
Fanaticonan di Union Berlin tabata entre esnan cu a celebra decision di e liga diasabra, y fanaticonan di Dortmund a sigui diadomingo door di desplega un borchi bisando, “Game, set and match – the winner is football.”
