Expansion di epidemia di coronavirus a shut down e museo Louvre di Francia ayera, cu trahadonan kende ta cuida su famoso coleccion di obra di arte temeroso di wordo contamina pa e fluho di bishitante di henter mundo na e museo.
“Nos ta hopi preocupa pasobra nos tin bishitante di tur caminda”, segun Andre Sacristin, empleado di Louvre y representante di sindicato pa su personal. “E riesgo ta hopi, hopi, hopi grandi.”
Un declaracion cortico di Louvre a bisa cu un reunion di empleadonan riba prevencion di virus a stop e museo di habri segun schedule ayera mainta. Esunnan cu lo a bishita ainda tabata wardando ayera tardi pa drenta e museum mas bishita di mundo.
E shut down a yega despues di decision di gobierno diasabra pa prohibi reunion publico di mas di 5mil persona. Sacristin a bisa cu e medida ta empeora e miedo di trahadonan di Louvre cu nan por ta den peliger di contaminacion, pasobra e museo ta ricibi decenas di miles di bishitante cada dia.
Otro reunion riba prevencion di virus ta programa pa awe, entre representantenan di sindicato y management di e museo, segun Sacristin, kende lo participa.
El a bisa cu lo mester somete bishitantenan na chekeo di salud pa protege empleadonan y si confirma algun caso di coronavirus ‘e ora ey mester cera e museo’.
Trahadonan a pidi mondmask, pero te awo a ricibi apenas desinfectante di base alcohol pa desinfecta nan man, el a bisa. “Esey no a complace nos en absoluto.”
Trahadonan di Louvre inicialmente a tene nan propio reunion ayera mainta y despues negociacion di demandanan cu management di e museo, el a bisa, y algun personal tabata nenga di traha pa motibo di contaminacion.
