Na mesa di redaccion di Bon Dia Aruba a yega un carta cu familiarnan di pashentnan di afdeling Verblijf di Respaldo a manda director di Respaldo relaciona cu e noticia recien, esta cu ta bay cera e afdeling y e pashentnan mester busca otro luga pa keda.

Den e carta, e familiarnan di e pashentnan ta indica cu desde cu a ricibi e prome carta for di Respaldo na juli, nan a reuni cu minister di Husticia y Asunto Social, Sr. Rocco Tjon. Nan ta bisa cu pa motibo cu mayoria di familiar di e pashentnan ta hopi preocupa mirando e forma inadecua den cual Respaldo ta atende cu e ciere di e afdeling Verblijf, unda no a busca un otro lugar unda pa transferi e pashentnan. Pa motibo cu tin falta di claridad tocante e cuido pa e pashentnan aki, nan a haya nan mes den necesidad pa bati na porta di minister di Asunto Social.

Nan a bisa cu e motibo cu Respaldo mester a corta gasto y a ricibi menos entrada for di AZV y gobierno pa cuido di salud mental ta algo cu e familiarnan di e pashentnan aki no por compronde. Nan opinion ta, segun e carta, cu mester resolve e cuestion e servicio na e pashentnan conhuntamente cu gobierno di Aruba, y cu no por tira e asunto aki riba scochi di e familiarnan. E interes comun di cuido di salud mental na Aruba tambe mester tene cuenta cu e interes di e clientenan cu estadia (Verblijf) den Respaldo.

Nan ta urgi pa Respaldo hunto cu Gobierno di Aruba percura pa un cuido sigur, adecua y humanitario (basico y/of specialisa) pa e clientenan di afdeling Verblijf di respado, prome cu cera e afdeling aki dia 1 di nomvember proximo.

E carta nan ta considera un protesta contra e ciere di afdeling Verblijf di Respaldo, al menos te ora cu por implementa un transicion na otro lugar pa e pashentnan y por duna cuido adecua na nan.

Manera Bon Dia Aruba a reporta weekend ultimo, entrante 1 di november 2022, Fundacion Respaldo ta haya su mes obliga di cera e seccion di estadia (afdeling Verblijf) cual ta conoci popularmente como PAAZ. Esaki ta evidente den un carta manda ayera door di presidente di hunta di maneho di Respaldo.

Den e carta, na cual redaccion di Bon Dia Aruba tin acceso, ta indica cu a tuma e decision definitivo pa cera e afdeling.

Ademas, ta indica cu e ceramento di e afdeling tabata depende en parti di sosten financiero di Afl. 900,000 priminti condicionalmente pa minister di Husticia y Asunto Social, Sr. Rocco Tjon. Sinembargo, no a cumpli cu e sosten financiero aki y pues mester cera e afdeling. E decision aki ta definitivo independientemente si e fundacion ta ricibi eventualmente mas tranche di sosten financiero for di gobierno.

Otro motibo cu a conduci na e ceramento ta e recortenan cu Respaldo mester a implementa cu a conduci na un escasez inaceptable di enfermero den afdelingnan di mayor urgencia pa algun tempo caba. No por usa e enfermeronan disponible pa e afdelingnan di mayor urgencia tanten cu e afdeling Verblijf ainda ta ofrece un hogar na e clientenan.