Famianan completo, hasta cu nacionalidad Hulandes, a scoge pa repatria: Caida grandi den peticion pa permiso di estadia

Tin un caida drastico den peticion di permiso di estadia, tambe relaciona cu trabao. Si normalmente e cantidad ta alrededor di 15 mil pa aña, DIMAS a mira un reduccion di 5 mil e aña aki. Asina Director di DIMAS mr. Kathy Ruiz Paskel a bisa Bon Dia Aruba.

Hopi trahador cu permiso a perde trabao. “Si tur aña tin peticion pa 15 mil trahador, pa 2020 e lo no yega ni 10 mil. Ta mira cu no a pidi hopi permiso. Y ora cu pidi permiso, e mester cumpli cu e checklist cu ta inclui e persona cu ta para garante, cu generalmente ta e dunador di trabao.”

Es mas, DIMAS ta proyecta cu otro aña lo mira un caida mas grandi, “pasobra te ainda tin hopi ta trahando cu companianan cu ta ricibi loonsubsidie. Pero e pregunta ta si e programanan di sosten aki lo continua.”

Consecuentemente Ruiz Paskel ta kere cu pa 2021, lo mira un caida grandi den peticion. Un hende cu ta di otro nacionalidad, sin un persona cu ta garante, no por keda Aruba sin un permiso valido.

Pais di origen

Tin hopi cu ta scoge pa repatriacion. Desde e inicio di Covid a cuminza cu e vuelonan humanitario, pero fronteranan tabata cera. Hopi hende cu tabatin permiso a pidi pa bay riba e vuelonan ey. “Nos a hasta mira personanan cu nacionalidad Hulandes pa bolbe nan pais di origen. E grupo tabata diverso. E tabata un indicacion cu e personanan no por a sostene nan mes na Aruba.”

Aruba ta negocia cu cada pais vuelonan humanitario, unda e persona mester tin e nacionalidad di e pais di origen. Pues por ta trata di persona cu nacionalidad doble. E vuelonan di repatriacion unda ta trata di turista, nan mester proba cu nan tin derecho di biba den e pais unda e vuelonan ta bay.

Menos peticion, menos aprobacion

A pesar di e hecho cu tin menos peticion aden, tambe a ripara cu e porcentahe di permiso cu DIMAS ta nenga tambe a aumenta. Normalmente DIMAS ta rechasa 10 porciento di e permisonan y awor e cantidad a subi riba 20 porciento. Entre e grupo aki tin hende cu tin mas permiso caba, pero cu pa un of otro motibo, e persona cu a para garante pa nan, ya no tin e posibilidad pa haci esey.

Ta purba tene cuenta cu e grupo aki, pero tambe mester tene cuenta cu cuponan di trabao limita na Aruba y ken tin prioridad pa haya esakinan. “Tin hopi local sin trabao cu kizas mester bay re-entrena nan pa yena cupo den un sector nobo pa nan. Esaki no ta bay di un dia pa otro, claro. Mester tene cuenta cu e periodo di transicion. E consehonan ta na Gobierno.

Mercado ta determina maneho di admision

Covid a impacta Aruba y sigur e personanan cu a pensa di keda biba na Aruba y a cumpra cas te hasta. Hendenan cu prome cu maart nunca a pensa di bay for di Aruba, a haya nan mes ta bende cas, auto y hiba henter famia back pa nan pais di origen. En todo caso, Paskel Ruiz ta kere cu den futuro ta mercado lo determina con e maneho di stranheria lo ta, pero si mester di e hendenan aki, e lo ta mas facil pa nan pasobra ya Aruba conoce nan y DIMAS tin nan detayenan. “Ta hendenan cu a contribui na nos economia.”

Deposito pa un start nobo

Un otro trabao cu DIMAS a haci pa yuda den e repatriacion pa percura cu e personanan cu bay for di Aruba ricibi e suma di garantia cu a deposita pa e prome permiso. Normalmente e proceso pa debolbe e suma por tuma algun luna. Pero pa yuda personanan bolbe nan pais cu un suma, ta paga nan e deposito na momento di sali cu e vuelonan humanitario. Por ehemplo un persona di Venezuela mester di un deposito di mil florin. E pasashi pa Venezuela ta rond di 230 dollar, y e resto di e deposito ta representa un suma na dollar cu por yuda e Venezolanonan reestablece na nan pais.