ORANJESTAD – Den dianan aki, na Aruba ta e temporada di campamento, cu aproximadamente 4.000 persona ta organisa na diferente luga, y asina nan por disfruta di e dianan di vakantie.
Bon Dia Aruba a haci algun entrevista cerca e personanan cu e dianan aki ta banda de Eagle Beach, y nan a expresa cu e temporada aki ta bayendo ‘hopi bon’.
Vocero di Departamento di Polis, sr. Lito Lacle, a confirma cu e temporada aki ta bayendo bon, te ainda nan no a haya ningun sorto di problema of yamada di keho.
Famia Webb a manifesta cu nan tin 12 aña campando na e luga ey, y te e momentonan aki ,nan no a haya ningun problema pa loke ta trata siguridad of algun otro cu lo por molestia nan estadia.
Sr. Zievinger, kende tambe ta haci uzo di e luga desde hopi aña pa campa, a expresa cu e tin un molestia, pa motibo cu e kier trece su trailer, pero autoridadnan a bis’e cu esey no ta permiti.
Henter comunidad mester tin consenshi di loke ta trata temporada di campamento na Aruba, pa motibo cu e dianan ey ta pa e famianan por disfruta y relaha di e stress di e dia pa dia. Asina tambe nan mester recorda cu campamento tin cierto leynan pa medio ambiente, y pa mantene e beachnan manera nan mester ta. Principalmente ta pidi comunidad pa tene cuenta cu nos a drenta temporada di turtuga, unda e animalnan aki lo subi riba beach pa pone nan webo. Pues ta pidi pa no molestia e bestianan, sino informa e fundacion concerni.
