E famia di e homber E.J.T.K.S. (40), Jimmy, cu a mata polis Tino Ruiz dialuna anochi kier duna nan banda di medaya. Nan ta conta di nan caminda di cruz pa haya yudansa pa Jimmy. E famia ta laga sa cu tur instancia; warda di polis Noord y te hasta minister di Husticia tabata sa di nan familiar y e problemanan cu e tabata tin. “Mi prima, cual ta un dokter specialisa den Spoedeisende Hulp a haci su best na e sitio pa scapa e bida di e polis”, un miembro di e famia di Jimmy(E.J.) ta comenta. E ta sigui bisa cu: “Na e momentonan aki nos como famia ta pasando un tempo hopi dificil. Mi primo tabata un persona hopi amabel y nos a stim’e masha hopi mes.”
Bisiñanan den shock
Algun rato despues di e incidente dialuna anochi, nos a purba di combersa cu algun bisiña cu tabata cerca. Un di e bisiñanan ta conta nos cu e tin mas o menos shete aña bibando den e bario y cu a mira polis bin e cas por lo menos un cinco pa seis biaha. E bisiñanan ta indica na Bon Dia cu casi semper a mira problema ey pero ta den shock di con esaki a escala dialuna anochi. Hopi tabata e caranan di susto y confusion cu no por a compronde con algo asina por a sosode. “Kico a escala e situacion pa yega asina leu? Con e meneer a dal e polis cu e bloki cu a kita su bida? El a dal e un solo biaha of mas?” tabata e tipo di preguntanan cu por a scucha ciudadanonan ta combersa cu otro.
Paaz no kier comenta
Den un articulo cu nos matutino a publica aña pasa october, nos a subraya caba cu nos comunidad sa masha poco di enfermedadnan psikiatrico y no sa unda pa bay of kico pa haci. Presidente di fundacion encarga cu cuido mental Jordan Ling Foundation, Clifton Ling, a laga sa e tempo ey, cu e ta haya ainda tin taboe riba e topico aki. E fundacion aki ta bay ubica Paaz bao di nan departamento psikiatrico, y tambe otro servicionan social cu ta cay bao di dje. Esaki segun e fundacion, lo por habri mas porta y brinda mas oportunidad pa e cuido mental por bira mas amplio. Bon Dia a comunica cu Paaz pa un reaccion riba e caso na Boegoeroei y si por a haci algo pa e ex pashent aki cu a perde su bida. Pero nos a haya como contesta cu Paaz no ta papia cu prensa, seguramente tampoco riba casonan di pashent. Pa esaki nan a referi nos na departamento di comunicacion di hospital.
No tur caso ta mescos
Chairlaine Huntington di e departamento di comunicacion na Hospital Horacio Oduber ta informa nos cu na Paaz nan ta haya pashent ambulante cu no ta drumi eynan. Como tambe pashent cu si ta interna na Paaz. E ta depende na cada pashent segun sra. Huntington ta laga sa. “E ta varia hopi pasobra cada caso ta diferente, tur persona cu acudi na Paaz tin un diferente tipo di problema. “ Director di AZV a brinda nos un splicacion riba con esaki ta traha, kico ta rekisitonan of indicacionnan pa cumpli cu ne pa wordo sigura, como tambe nan punto di bista riba e problema aki cual nos lo publica e siman aki.
Bon Dia ta den contacto cu e famia pa haya poco mas aclaracion riba caso di jimmy y e caminda cu nan mester a cana pa busca cuido pe.
