Robert Lewis, miho conoci online como BlackDevilX (BDX) a fayece dia 18 di december ultimo mientras e tabata di vakantie cu su famia na Aruba y dia 19 di december e noticia a bira conoci. BDX tabata conoci den circulonan di gaming y streaming na Merca.
Lewis tabata conoci den escena di Sonic, gaming y animacion di internet. Segun un mensahe publica riba cuenta di X di ruman di Twitter, BDX, 36, tragicamente a sufri un atake di curason mientras e tabata di vakantie na Aruba cu su famia. A pesar di esfuerso di varios profesional medico, no por a resucit’e.
Den su post, ruman muhe di BDX a expresa un lamento profundo.
Segun un post riba givesendgo.com, cu ya a ricibi $2,327 den donacion, Lewis “tabata di vakantie na Aruba cu su personanan mas faborito den henter mundo, su famia, ora el a sufri un atake di curason cu a cobra su bida. Rob ta laga atras su esposa, dos yiu homber, tres ruman, mama y stiefvader stima, un comunidad di followers cu tabata stima su arte, y un legado increible.” E fundraiser ta pa cubri e gastonan di entiero, y tin un meta di $12mil.
Segun e post, e famia ta preparando pa bolbe for di Aruba pa prepara servicio funeral.
Un amigo di BDX, Aeon, a skirbi riba Discord den un post honrando su legado, cu DBX tabatin un historia di problema di curason, incluyendo un atake anterior. Adicionalmente a revela cu DBX tabata trahando riba FFSX7 (Final Fantasy Sonic), cual el a completa pero despues a revisa pasobra no tabata satisfecho cu e producto final. Aeon no a confirma cancelacion di serie FFSX, maske su futuro ta keda incierto.
