Diasabra ultimo, famia y amigo di conocido musico, pintor, locutor y periodista Toty Arends a record’e cu un anochi di musica organisa pa su amigo Tula (?). Tambe a desplega algun di e pinturanan di e artista multi-facetico aki.

Durante e encuentro aki, facilita pa UNOCA y presenta pa Percy Jeandor, un trio musical consistiendo di Tula na piano, Anderson Bahamon na bajo y Aaron Giel na cuarta a deleita esnan presente tocante e melodianan bunita componi pa Toty Arends, manera Bonnie, Maria Elizabeth, Baba, Cayenna, y Luna di Andicuri. Talentoso cantante Oriana Geerman a interpreta tres cantica, esta Mi Tin Mester Di Bo, Speranza y Bandera Leal.

Entre esnan presente tabata famia di Toty: su yiunan muhe Vivianne, Virginia y Veronica, su nietanan Pilar y Veronica, y su bisanieta Madeline. Ademas e anochi a conta cu presencia di amigonan di musica y prensa, manera Maybelline Arends, Emile Kelkboom, Edgard Kelkboom, Carlos Bislip y hopi mas.

Vivianne Arends, yiu di Toty, a presenta e biografia di e artista multi-facetico. Den su discurso, el a bisa: “Awe nos ta reuni pa rindi un homenahe mereci na un persona berdaderamente extraordinario: nos bisawelo, welo, tata y amigo: Jacobo Federico Arends, mihor conoci como Toty. Su bida tabata un testimonio di dedicacion, pasion y amor pa musica, arte, cultura, y tur loke Aruba ta nifica.”

Vivianne a recorda cu Toty a nace na Aruba dia 30 di december 1927.

Su trayecto musical a cuminsa tocando sinfonia di boca na edad di 7 aña y forma un conhunto musical cu otro muchanan. Toty tabata un musico autodidactico, reconoci como pianista, areglista y director di e legendario conhunto Los Duques, cu a toca pa miembronan di Cas Real di Hulanda durante nan bishita na Aruba. Ademas, Toty a dirigi y aregla pa e recordado orkesta “Estrella Musical” di Club Estrella di Sta. Cruz.

Riba tereno didactico, Toty a duna lesnan di bajo, piano, cuarta, guitara, mandolin y percusion na miembronan di “De Trupialen,” un organisacion di cual e tabata un miembro di honor.

Toty a biba hopi aña na Guatemala, unda el a duna un concierto di piano di musica Arubiano na “TGW La Voz de Guatemala” na 1947, cu e resultado cu e mester a duna un di dos concierto. Na Guatemala, riba orgel electronico, el a alegra hopi fiestanan bailable y tambe a siña hopi hende toca orgel electronico.

 

Pa hopi aña, Toty tabata presidente di hurado pa Festival di Tumba den nos Carnaval y tambe pa hopi Festival di Dande y Folklor di Sr. Harry Croes. E ta e persona cu a inspira y presenta e proyecto didactico “Lor’un Wals” di su recordado amigo, Eddy Bennet, cu e ser auspicia pa Unoca.

Toty no tabata solamente un musico talentoso, pero tambe un defensor incansabel di nos cultura. Su lucha pa habri e porta di Cas di Cultura ta un ehempel di su compromiso cu preservacion y promocion di nos tradicionnan. Danki na su esfuerzo y colaboracion di dos di su amigonan, esta Lio Booi y Maikel Kuiperi, awe nos por disfruta di un espacio dedica na nos cultura.

Toty Arends a fayece dia 20 di december 2017, pero su legado ta hancra den nos. Su amor pa musica y su deseo pa mira otro hende prospera den e campo aki, ta algo cu lo keda pa semper den nos curazon.

Finalisando, Vivianne a bisa: “Toty a siña nos pa balora loke ta di nos, pa aprecia nos musica y pa nunca subestima nos propio talento. Un ehempel bibo di esaki ta e ideador y organizador di e evento aki, esta Tula, kende na su turno ta traspasando e legado aki na su alumnonan cu lo presenta awe.”

Su nietanan, hefe di redaccion di Bon Dia Aruba, Pilar Flores, y station manager di XFM, Veronica Avila, conoci entre famia como “Bonnie”, a duna palabra recordando nan welo stima. Avila a reconoce cu tabata un momento hopi emocional pa e famia, ya cu a recorda nan infancia lantando cu Toty, kende nan tabata yama “Abuelazo”.

“E no tabata gusta nada chikito. E no tabata kier ta un ‘abuelito’. E tabata bisa ‘mi ta boso Abuelazo,’” el a recorda. “Esey e tabata pone den tur loke e tabata haci, su musica, su arte, tur cos mester tabata grandioso.” Y e semper tabata kier transmiti e mensahe cu “Aruba no ta chikito, Aruba ta grandioso” cu tur hende.
Flores a bisa cu “musica di Toty ta bay biba pa semper, y su legado tambe ta pa semper.”

Final di e anochi, Jeandor a comenta cu e canticanan cu a scucha ta un parti chikito di e cantidad valioso di composicion cu Arends a laga atras. “Toty ta di nos,” el a bisa.

Famia di Toty Arends ta manda palabra di gradicimento na Sr. Eddison “Tula” Mademilia pa a organisa e anochi musical bunita aki y na tur amigo cu a asisti pa nan presencia y cariño, y na Unoca pa facilita e evento aki.