Famia y abogadonan lo continua e lucha pa derecho di bida y morto digno; Decision pa para eutanasia di Martha Sepúlveda ta arbitrario y sin respet

E decision na ultimo momento pa nenga Martha Sepúlveda pa por a muri na un forma digno tabata uno sin respet y ilegal. Esey ta opinion di famia y abogadonan di Sepúlveda. E dama Colombiano, di 51 tabata di a muri pa medio di asistencia, esta eutanasia Diadomingo ultimo y lo tabata e prome pacient cu Corte a permiti pa muri cu asistencia sin cu e ta sufri di un malesa terminal cu ta duna un perspectiva di bida di seis luna of menos.

Sinembargo, Sepúlveda ta sufri desde 2019 di un malesa degenerativo, conoci rond mundo como Lou Gehrig’s Disease. E malesa yama sclerorsis lateral amyotropico, ALS, cu ta un malesa degenerativo di e sistema nervioso cu ta afecta e mobilidad di curpa y ta fatal. Problema ta cu morto por dura aña pa bin, pero e calidad di bida ta hopi abou y doloroso.

E Instituto Colombiano di Dolor Incodol a dicidi riba Diasabra, un dia prome cu e eutanasia mester a tuma luga, cu nan ta reconsidera y ta cancela e procedura, mirando cu e caso di e pacient no ta cumpli cu e criteria di terminacion di bida.

Famia di Sepúlveda a expresa disgusto cu e decision. “E decision ta uno sin respet y no ta presentabel,” ta locual yiu di e señora, Federico Redondo a bisa. “Nan a haci tur cos den secreto, y no a notifica ningun hende cu nan lo reuni. E dokter di mi mama a atende e reunion y no a informa nos.”

Redondo a bisa cu nunca e comision medico nunca a evalua su mama prome cu nan a dicidi pa hala e decision pa permiti e eutanasia, y cu a tuma nan posicion sin tuma e pacient na cuenta.

E grupo di abogadonan, bou di e capa DescLab, e Laboratorio di Derechonan Economico, Social y Cultural,a rechasa e cambio di posicion di Indocol. “Nan ta bisa cu Martha no tin un malesa terminal. Esey ta un decision ilegal y arbitrario,” e abogadonan a bisa. “E lucha di Sepúlveda pa tuma control lo sigui. Indocol a viola e derecho fundamental di Martha pa un morto digno, a viola su derecho pa un bida digno.”

E abogadonan ta enfatisa cu e dama ta cumpli cu tur rekisito legal pa por pidi eutanasia. E ta sufri di un malesa serio y incurable, ta sufri dolor y a expresa explicitamente cu e kier muri.

Sepúlveda a bisa den otro entrevistanan cu e tabata feliz y calmo pa termina su bida. “Dios no kier mira mi sufri,” e Catolico a bisa y cu pa motibo di su condicion ta birando pio, e miho cos cu por pasa cune ta muri y descansa.

Colombia ta e prome pais den Latino America cu a decriminalisa eutanasia. Esaki a sosode na 1997 y ta un di e poco paisnan rond mundo unda e procedura ta legal. Pero te cu e aña aki, unicamente ta permiti eutanasia den casonan unda e prognosis ta termina, cu un expectativa di bida di seis luna of menos.

Pero tabata na Juli 22, cu Corte Constitucional Colombiano a expande e derecho, pa permiti e procedura ora cu e pacient ta sufri dolornan fisico of mental intenso.