En conexion cu e entiero di e dos ruman hombernan Rishandroh Richard Anastacia y Rishandrick Eugene Frans, tur prensa di Aruba ta wordo invita na e condolencia y entiero. Esaki segun e relato cu Bon Dia Aruba a haya di Tera Group.
Bon Dia a tuma contacto cu Elizette Croes di e PR agencia cu e pregunta pakico prensa a wordo invita activamente y di parti ken e invitacion a bin: “E invitacion ta bin di e famia y di e tata di e muchanan mes”, segun sra. Croes. “Si no ta invita prensa, nan lo ta presente toch. E funeraria ta pone stoel y mesa pa e periodistanan y tambe tin coriente pa asina nan por haci nan trabou y cubri e entiero. Claro cu e famia ta suplica pa no saca potret di cerca pa asina respeta e defuntonan.”
Famia ta laga sa den un relato cu tur otro hende cu ta pendiente, preocupa y ta desea di keda informa y tambe kier ta involucra, por atende. E programa lo ta siguiente:
E anochi di condolencia ta dia 5 di december na Ad Patres Funeral Home na San Nicolas. Orario ta 6.00pm – 9.00pm
E entiero lo tuma luga dia 6 di december na Misa Santa Teresita na San Nicolas. Orario ta 1.00pm
E defuntonan lo ta na misa di 1.00pm pa 4.00pm. Lo tin oportunidad pa duna condolencia na e famia den misa.
Pa 4.30 di atardi lo sali for di misa pa hiba e defuntonan pa nan ultimo luga di sosiego na Santana Catolico na San Nicolas.
Muchanan cu ta atende anochi di condolencia of entiero, por bin cu peluchi pa e rumannan y tambe por bisti un T-shirt di Cookie Monster of color blauw cla. Ta bay bin un box disponibel pa cualkier persona cu kier haci un donacion pa funeraria y na misa pa Casa Cuna.
Minister-president Eveline Wever Croes ta nombra dia 6 di december un dia nacional di luto. Nan a pidi tur departamento di gobierno pa expresa den un forma e luto y tambe pa scolnan pone atencion riba dje.
