Famia sin vacuna contra sarampi mester colga bandera cora

Famianan cu no a vacuna contra sarampi na e nacion Pacifico di Samoa a ricibi peticion pa colga un bandera cora pafo di nan cas, pa yuda combati e brote mortal di e malesa.

E bandera lo asisti ekipo medico cu ta bay cas pa cas pa vacuna e residentenan. Gobierno a bisa cu mas di 4.000 persona ta infecta cu sarampi den un poblacion di 200.000. Alrededor di 60 persona a fayece caba y mayoria ta muchanan bou di 5 aña di edad.

Samoa a declara estado di emergencia na november pa combati e brote y vacuna awo ta obligatorio. Tur scol ta cera y muchanan bou 17 aña di edad tin prohibi pa bay den reunionnan publico. Autoridad di Samoa ta bisa cu e vacuna a alcansa alrededor di 55% di e poblacion. Prome Minister Tuilaepa Sailele Malielegaoi a priminti di aumenta esaki na 90%.

“Nos muchanan y hende nunca lo ta immuun pa cualkier epidemia den futuro te ora cu nos tin 100% di cobertura di vacuna. Ta e unico antidoto”, e minister a bisa. Unicef a manda 110.500 vacuna pa e pais. New Zealand a manda remedi, enfermero y ekipo.

Usualmente ta tarda entre 10 dia pa 2 siman pa e vacuna cuminsa traha. Ta reporta cu algun persona ta bendiendo remedi falso. Tonga y Fiji tambe a declara estado di emergencia pa combati e sarampi luna pasa. Sin embargo, ambos pais tin porcentahe di vacuna halto, mas di 90% den ambos pais y no tin ningun morto raporta.

Sarampi ta un malesa viral altamente infeccioso cu por duna complicacion di salud serio, incluyendo infeccion den pulmon y cerebro. E infeccion su porcentahe ta aumentando mundialmente. Organisacion Mundial di Salud (WHO) a reporta na april cu e cantidad di caso reporta mundialmente a multiplica cuatro biaha den prome tres luna di aña compara cu mesun periodo na 2018.

Mas di 5.000 a fayece muri di sarampi na e Republica Democratico di Congo y casi un cuart miyon di persona ta infecta. WHO a bisa cu e brote ta moviendo lihe.

Sarampi ta un virus cu ta pone cu inicialmente nanishi ta core, nister y keintura.

Despues rash ta cuminsa na e cara y ta bay na henter e curpa.

Mayoria di persona ta recupera, pero sarampi por causa discapacidad pa resto di bida. E por ta mortal, specialmente si ta causa pneumonia den pulmon y encefalitis (hinchamento den cerebro). Ta calcula cu 110.000 persona ta muri di sarampi cada aña.