Famia Anastacia a ta pidiendo hues castigo maximo pa esunnan cu a comete e crimen cruel contra Rishandroh y Eugene, cu a haya e nomber caso Speeltuin.
Esaki ta locual e famia a bisa durante e rueda di prensa cu a tuma luga ayera tocante di e caso di Rishandroh y Eugene a fayece na december 2017.
Xiomara Bislip di Fundacion Lisette Gomez a splica cu e intencion di e rueda di prensa aki tabata di e caso di Speeltuin cual lo tuma luga diabierna awo den corte. E meta ta pa recorda e comunidad di Aruba di e caso aki sra. Bislip a bisa ‘Esaki no tabata mag di tuma luga nunca’ ta spera cu e morto di e dos muchanan aki no ta envano y cu esaki nunca mas sosode.
E famia ta spera di mira cambio den ley di proteccion di mucha pa e caso lamentabel aki no bolbe ripiti. Nan ta pidiendo e hues e castigo maximo pa e dos personanan aki cu a comete e crimen.
Marie Anastacia cu ta tanta, di parti di tata di e criaturanan ta splica cu locual nan kier logra ta husticia y ta haci un yamada na hues pa tuma e decision corecto na unda cu tur lo keda satisfecho cu e castigo aki, lo bay dicta pa e dos personanan cu a kita bida di Rishandroh y Eugene.
Hopi pregunta coriendo rond ta di unda e famia tabata pa por a evita e desgracia aki . Maria Anastacia ta aclara cu varios biaha e mes tabata busca e muchanan cerca e wela, y nunca el a bay cerca e mama. E ta bisa cu e mama semper a nenga pa e tata di e mucha por a wak su yiunan.
Segun sra. Anastacia e ruman homber tambe a wordo menasa pa Gabriel (padrastro). Tambe e por a ripara cu e muchanan nunca kier a bay cerca nan mesun mama. Cual e ta aclara cu nan a pensa cu esaki tabata normal, sin a pensamento cu algo grave tabata pasando den e bida di e criaturanan aki.
“Tin hende papiando cosnan incorecto, sin sa di nada,y esaki mi no kier. Nos no por husga ningun hende. Mi no ta husgando sea mi ruman, sra. Frans (mama di e muchanan) of niun hende, pero ami ta papia pa mi mes. Nos a biba cu e muchanan”, asina sra. Anastacia a aclara.
Sra. Anastacia a sigui splica cu durante di e periodo di entiero e famianan di ambos banda tabata hopi uni, pero ora e caso a bin dilanti hues el a sinti falsedad. El a aclara cu e no tin nada contra niun hende anto e ta compronde cu sra. Frans ta nan famia, pero sra. Frans y Gabriel mester papia berdad di kico nan tabata haci cu e muchanan aki
“Si di berdad boso stima Rishandroh y Eugene a yega ora boso papia berdad y con e trato tabata entre e muchanan y sra. Frans y Gabriel. No haci awo manera ya e ta den pasado, y awo ta defende sra. Frans y haci como si fuera e tambe tabata victima di e abuso di Gabriel”, sra. Anastacia a aclara.
Den un momento di tristesa sra. Anatacia a remarca cu ‘no tin dia cu ta pasa’ cu nan no ta pensa riba e muchanan. “E sufrimento cu ami no por a scapa su sobrinonan.” El a aclara tambe cu Voogdijraad tin cu cuminsa tuma decisionnan corecto. Un yiu por ta sigur sea cu nan mama of cu nan tata. Locual e ta pidi comunidad ta si wak/scucha algo pa por fabor duna ayudo of busca ayudo pa asina preveni casonan similar manera esaki sosode. Asina por salba bida di un otro mucha.
“Semper entrega un keho na e departamento concerni anto si nan no kier tende, mi ta conseha e persona pa bay prensa anto asina e departamentonan concerni lo cuminsa move y cuminsa haci nan trabou manera debe ser. No ta perhudicando ningun hende mas bien bo ta salbando un bida”,sra. Anastacia a termina bisando cu nan no tin ningun contacto cu sra. Frans y Gabriel. Nos no ta desea esaki tampoco. “Nos kier yega na curason di pueblo y curason di hues pa por sinta pensa y tuma decision corecto. El a pasa cu nos sobrinonan, mañan e por sosode cu cualkier ser keri di esunnan presente hasta di e hues mes cu tur respet, pero pa e tuma e decision corecto.”
Si hues dicta tiki aña pa e dos personanan cu a comete e acto aki nos lo apela e caso. Sra. Anastacia no kier pa e personanan concerni comete e mesun acto atrobe. E caso den corte lo ta diabierna pa 9or di mainta. Diahuebs anochi pa 8or lo tin un actividad di cende bela, oracion dilanti e corte.
“Na Aruba tin e custumber cu ora algo sosode tur hende ta den panico pero despues di dos, tres luna tur hende a lubida kico a sosode. Nos a yega di haci actividad anto honestamente e unico personanan cu ta presenta ta nos como famia y e grupo di e fundacion Lisette. Nos ta pidi pa tur esunnan cu por bin pa duna aporte y acompaña nos, nos lo aprecia esaki”, sra. Anastacia a aclara.
