Famia Planea: Mester adapta e maneho pa e hobennan di awendia

Famia Planea tabatin un aña 2019 activo. Pa aña 2020 nan ta mira e reto cu nan lo traha cune pa asina sigui trece e mensahe di conscientisacion na hobennan.

Director Evelyn Yarzagaray a duna splicacion di aña 2019, unda e ta bisa cu tabata uno sumamente satisfecho. Nan a wak positivo y kico a funciona y kico no a funciona pa asina por haci adaptacion.

El a remarca cu un di e partinan mas fuerte tabata e parti di inverti den educacion sexual y integral. Sinembargo el a bisa cu esey a funciona hopi bon y ta refleha den cifra, pa motibo cu nan a wak un crecemento cu 56% di scol cu a ricibi un tayer durante henter aña escolar.

Famia Planea tin programa fiho na varios scol, tambe na educacion special. “Nos ta traha duro den 2018 cu IPA pa bin cu contenido pa diferente edad y scol. Segun e crecemento di mucha, anto esey nan a bin ta haci durante 2019 y a mira un bon resultado.”

Un aspecto positivo, pasobra hoben ta haya na scol tur e informacion. E no ta algo cortico, pa motibo cu e tin un continuidad y contenido. Esey ta duna espacio na tur cu bin cerca nan pa haya e servicio completo.

Sea nan ta haya e servicio personal of si nan kier sigui ricibi cualkier servicio di nan via medionan social, website of cualkier servicio, manera na scol. “Na algun scol tin un ‘one on one counseling’, cu nos ta bay e scol y asina tene encuentro cu e hoben mes cara a cara.”

Esaki ta demostra cu ora ta trata cu hoben pa crea un relacion di confiansa, ta duna un bon fruto.

Esey ta mustra nan cu bes nan ta traha cu hoben pa crea un relacion di confiansa y ta duna nan bon fruto. Esey nan a bin ripara cu nan por a saca e cifra di 2019 den comparacion cu 2018, tabatin un crecemento di 19.6% den cantidad di hoben cu a alcansa.

Den comparacion cu 2018, 2019 a aumenta cu un 22.1%. Segun Yarzagaray, e parti di mas importante pa nan como organisacion ta cu por wak un crecemento grandi. Tabata un aña exitoso pa nan.

“Nos a ‘rebrand’ pa fin di aña 2019 pa asina drenta 2020, cu Famia Planea ta cumpli 50 aña, pa ta fresco y cara nobo. Tambe un otro maneho cu ainda falta, pa haya tayer y pa haci uzo di nos servicio pa garantisa continuidad y calidad di servicio pa nos cliente existente”, el a bisa.

Yarzagaray ta bisa cu generacion ta cambia, nan ta tuma reto como Famia Planea pa cambia cierto strategia pa asina por cambia pensamento, tambe pa nan por experiencia y traha duro riba formato di nan organisacion.

Nan a haci algun cambio den e team. Nan staf ta ‘relativamente hoben, capacita y cu un background cu nan por atende hoben’. Di e forma aki nan ta mas strategico. Famia Planea a ripara cu a duna un satisfaccion cu a sinti cu nan ta ocupa na e parti di rebranding.

Cu maneho y organisacion, nan kier cambia e statuut, e preparacion pa adaptacion den nan servicio, pa purba modernisa nan servicio lo mas posibel y brinda un pakete completo, manera nan a splica.

Yarzagaray ta bisa cu nan plataforma di medionan social tambe ta atende cu cliente, pa asina purba di yega mas cerca di nan y nan por tin oportunidad pa yega Famia Planea tambe. E ta agrega cu nan tin un ‘laso estrecho cu AZV, dokter di cas y otronan’.

Segun e ta bisa cu hoben no ta mescos cu 10 aña pasa. Pero a haci diferente investigacion cu IPA y universidad di Aruba, pa intencionalmente traha hunto cu e cambionan cu ta sinti ta adecua pa e hobennan.

“Nos a bin ta anticipando cierto cambio den comportamento cu nos hobennan tin. Nos por wak esey y adapta nos mes na proyecto y aborda e cambionan aki. Nos ta comodo en general cu nos a bin traha duro pa unabes nos yega 50 aña, nos como Famia Planea ta sinti un area fresco y ta duna calidad di servicio”, Yarzagaray a expresa.

Cu esey nan lo logra cu tempo, sinembargo e ta bisa cu nan ta keda pone enfoke riba hoben y pusha ‘pa keda mas creativo cu nunca’. Tambe mester tuma na cuenta e buraco cu ta keda entre generacion di hoben y adulto.

Nan ta purba di ta memey di nan, pa purba para banda di e mayor y banda di e hoben pa duna guia. Tambe pa educador. E ta bisa cu scol mester un tiki di cada informacion pa keda top di nan wega, mester creatividad y nan ta mas confortabel di e parti ey.

Famia Planea ta contento cu nan cliente, e stakeholders, scol, dokter di cas, AZV, nan partners local y internacional. Pa nan cliente exitoso y positivo. Nan ta cla pa 2020 y cu nan 50 aña di existencia, cu nan reto. “Tin cosnan cu por bay menos bon, pero ta haci adaptacion pa por saca e miho di dje.”