E rol di e fundacion Famia Planea ta keda importante pa sigui papia y brinda informacion, pero na final di dia ta na e persona cu ta ricibi e informacion. Pa e fundacion, ta importante pa comunidad tin e hermentnan y pa haya informacion tocante diferente aspecto y temanan pa loke ta encera salud sexual reproductivo, y bo salud sexual generalmente.
E fundacion ta bay enfoca hopi riba e parti di educacion pa e temponan cu ta bin y 2023 bay dilanti pa sigui crea un bon conexion y comprension cu clientenan.
Famia Planea su vision ora a inicia nan re-branding tabata enfoca mas riba tin e conexion cu cliente y confiansa cual ta hopi importante. Famia Planea no t’ey pa impone riba kico bo por of no por haci, y hopi biaha ta pasa cu comunidad ta mira e fundacion – cu ta traha riba prevencion sigur – pero ta mira nan como e acto sexual, pero sexualidad ta hopi mas amplio segun directora di e fundacion ta expresa. Sinembargo si bo kier enfrenta solamente e tema di acto sexual e ta algo natural den bida di cada ser humano, un derecho fundamental. E mester ta algo placentero y pa esaki ta asina pa cada ser humano, e fundacion kier yuda bo y informa bo pa asina bo por evita e risiconan y consecuencianan negativo. “Pa e keda como un acto placentero pa bo, si bo kier wak e dus riba e acto sexual so, pasobra sexualidad ta hopi mas amplio y pa nos ta importante pa keda informa y ta un sosten pa e cliente,” Directora di Famia Planea Aruba, Evelyn Ras -Yarzagaray ta bisa.
Problema cu ‘Nudes’
Pa e motibo aki e parti di drenta e scolnan ta keda un aspecto pa ta algo interactivo. Awendia bo no por bisa por ehempel ‘no manda un potret sunu pa hende of video’, segun e directora ta splica esaki ta keda na cada persona. E ta bon si pa subraya e consecuencianan riba termino corto y largo si.
Esey ta e rol cu comunidad mester compronde ora ta trata Famia Planea cu nan berdad ta cubri e asistencia na tur e scolnan primordialmente. Ora un situacion por ehempel di un hoben cu ta manda potret sunu presenta, e scolnan ta yama e fundacion pa purba yuda pa interveni. “Pero tin e ora mester wak pa kico e persona ta tuma cierto decisionnan, tin biaha e ta bay mas profundo. Dus e ta un cuestion pa crea un relacion cu e persona aki, di contacto y confiansa pa asina por keda guia y splica risiconan mara na dje.”
Tin cosnan cu hende ta lubida pero den pasado a pasa cu tin tipo di videonan y potretnan asina cu te dia di awe a perhudica hende den nos comunidad. Pues bo ta subraya esakinan como ehempel pa e hobennan sa cu mañan den ki area bo kier bay dedica bo mes, pa tene cuenta con pisa algo asina por cay den un comunidad asina chikito.
E directora ta splica cu den luna di September tur aña desde 2007, United Nations y World Health Organization ta proclama cu esaki ta e luna pa para keto riba e parti di salud sexual/reproductivo. Famia Planea a uni nan mes cu esaki mas pa loke ta e parti di conscientisacion den cuadro cu trabaonan y proyectonan realisa desde 2007.
Esaki ta e oportunidad pa enfoca no solamente riba productonan pero sigur riba e parti di salud sexual mes, e parti di higiena y otro aspectonan cu ya e scolnan ta haya pero tog un tiki mas riba e conexion cu e cliente, pa asina mehora e guia cu nan ta ricibi. “Pa nan por duna nos feedback di e productonan cu nan ta uza y servicionan cu nan ta ricibiendo, y esey no ta conta solamente pa clientenan one-on-one. Nos ta bay back na e scolnan tambe pa wak con nos por mehora e aspecto di e trabao cu nos ta haciendo pa comunidad, pa asina mehora e calidad tambe riba e aspecto di salud sexual reproductivo,” Sra. Ras- Yarzagaray ta comenta.
Desde aña 1970, Famia Planea ta traha completamente riba e area preventivo, manera conoci e anticonceptivo cu nan ta provee ta no solamente pa evita embaraso no desea, pero tambe pa malesanan contagioso cu tambe ta lantando cabes. Den transcurso di aña e fundacion ta bay enfoca mas riba e parti di educacion pa asina por educa y bay un tiki mas den contenido den salud sexual. Pa pone mas atencion riba con e curpa ta hinca den otro y tambe e parti emocional pa fiha con lo guia via un pakete di educacion na scolnan por ehempel. Pa asina ora cu mester servicio di Famia Planea, pa e hobennan y adultonan sa kico e fundacion ta para p’e y ta bon informa.
