Famia Planea experenciando reto financiero

Director di Famia Planea Aruba Evelyn Ras – Yarzagaray a bisa cu e ta un reto pa mantene e calidad di servicio na nan clientenan halto. A pesar di esaki nan ta haciendo tur locual nan por, consecuentemente a aumenta nan cantidad di cliente. Tin algun servicio cu tabata gratis, cu ya no ta gratis mas y a aumenta e suma di contribucion.

A concentra hopi riba e edificio cu nan a muda awo den dje y cual aspecto di privacidad di consulta a enfoca hopi riba dje.

E parti financiero ta hunga un rol hopi grandi y p’esey netamente e cambio di localidad tambe. “Nos ta drentando un era nobo (Famia Planea) despues di 45 aña. E aspecto financiero naturalmente no ta facil pero atrobe pa bo ricibi bo tin cu duna y ta p’esey ta dunando e maximo di nos pa laga e cliente sinti e siguransa cu nos t’ey pa brinda e council cu nan mester, e producto cu nan mester y ta depende riba dje. P’esey ta enfocando riba e calidad”. Unabes nos por brinda e cliente e calidad cu nan ta spera di nos y cu nan ta sinti nan mes confortabel, mi ta kere esey lo drecha un parti di e aspecto financiero, e director a agrega.

Famia Planea ta cobra un fee hopi chikito di miembresia y esey a bin ta adapta, specialmente den e transcurso di algun luna pasa. “Hisando e contribucion nos por mehora nos servicio tambe.” Segun Sra. Ras – Yarzagaray, tin algun servicio cu tabata gratis cu awo mester paga un fee chikito p’e pa asina por sigui drecha e ambiente cu ta yuda e clientenan aden”.

“E no ta facil, na 2016 e sistemanan nobo cu ta introduciendo di parti di gobierno ta cosnan cu mester adapta na dje y ta haciendo maximo esfuerso pa adapta na e cambio aki, sin cu e ta na desbentaha di e cliente.  Nan ta keda nos prioridad y number uno pa e fundacion”.

A puntra Sra. Ras Yarzagaray si ta experiencia cu hende ta abusa di nan servicio el a bisa: “Tin ora tin necesidadnan di cierto productonan cu bo mester por haya na un bon prijs, pero naturalmente kier brinda e siguridad tambe. Tin ora tin cu trek e liña pa hende wak cu como fundacion ta haci e maximo esfuerso pa brinda e miho calidad na e cliente, Sra. Ras – Yarzagaray a bisa.”

Sosten comercio

E director ta splica cu tin diferente categoria di fundacion, tin esunnan den area preventivo y curativo. Hopi biaha esunnan cu ta traha den e aspecto curativo tin hopi mas balor emocional como cu bo por conta y midi esaki. Ora algo ta preventivo, no por midi cu cifra y haci e impacto cu kier haci. E ta splica cu por ehempel pa loke ta e campaña di “I love My Body”, por bin cu campaña y mensahe, pero no por duna cifra di cuanto hende realmente a haci uzo di un condom. Esey ta cosnan cu no ta visibel, cual hopi biaha pa e sector priva ta hopi fastioso como fundacion den area preventivo pa haci un impacto. Nan ta bay hopi mas lihe  na e aspecto curativo cu nan ta wak directamente unda e placa ta bay. 

Den e aspecto preventivo mester hinca placa, pero ta despues di hopi aña ta wak e resultado. “Riba un isla chikito hende no tin e pasenshi pa warda y wak kico ta e efectonan positivo cu ta bin despues di tempo, Sinembargo ta purba di ta mas creativo cu campañanan pa yega sector priva un tiki mas pa por haya e sosten financiero cu ta desea. Atrobe ta keda haci maximo esfuerso aunke cu e no ta unda cu nos kier pa e ta, pero nos ta compronde. Nos sa cu tin hopi fundacion aki na Aruba cu tur ta haci un bon trabou y nan tin nan metanan cu nan ta para duro p’e. E ta depende di cada compania y cada inversionista den kico nan ta haya cu nan placa mester bay aden. Esey nos ta respeta, aunke cu ta keda bringa y ofrece e miho na e hobennan di Aruba.”

“Hobennan ta esunnan cu nos kier proteha pasobra ta esey nos mester para pa e futuro, no solamente pa embaraso no desea, pero pa malesanan cu a largo plaso tin consecuencia pa nos Pais tambe. Pues e efecto di cierto cosnan chikito cu ta wak awo anto dentro di aña ta wak e problemanan social cu tipo di cosnan asina por trece. P’esey ta pusha e importancia di salud sexual di cada hende, enfocando cu bo mester tene cuenta cu ne, pasobra aworaki e por ta leuk y pret, pero e consecuencianan ta bin despues pa henter comunidad”, e ta termina.