Famia Planea Aruba cu campaña di reparticion di anticonceptivo: ‘Mas di 20.000 condon parti den carnaval pa crea mas consenshi’

Henter aña pero specialmente durante temporada di carnaval, Famia Planea Aruba a duna di conoce cu den e temporada aki nan ta parti mas di 20.000 condon pa hoben y adulto.

Jonathan Trinidad, IEC Coordinador di Famia Planea Aruba a splica cu ta parti esaki specialmente durante e paradanan di carnaval na puntonan strategico, por ehempel e ekipo di Cruz Cora Aruba, na tent di Kiwanis Club Palm Beach of na propio oficina di Famia Planea.

Trinidad a menciona cu ekipo di Cruz Cora ta cana cu un tas y nan ta parti na e personanan cu ta pidi of e persona mes por acerca nan pa por haya e anticonceptivo aki.

“Esaki ta enfoca riba cambia un tiki e mentalidad di hende, pa nan bira mas consciente,” Trinidad tambe a menciona cu esaki no ta sucede den temporada di carnaval so; e personanan cu ta miembro di e organisacion aki tambe por haya na oficina riba cualkier dia di aña.

“E strategia ta traha pa e simpel motibo cu e ora ey no ta parti esaki pa loco, pa motibo cu esey no solamente ta un perdida pa nos, sino cu nos por tin mas control tambe,” Trinidad a sigura.

Trinidad tambe a conta cu e cantidad di mas di 20.000 condon ta pa parti den temporada di carnaval so; e cantidad pa aña ta rond di 160.000 pa 165.000 condon.

Tabatin hopi discusion riba internet tocante e cantidad halto cu ta parti durante carnaval, pero a splica cu esaki ta pasobra ta un temporada cortico pero e cifra ta mas halto pasobra ta conta e cantidad parti na evento hunto cu loke ta haya via e miembronan.

Tambe a trece dilanti cu e edad di esnan cu ta haya e anticonceptivo aki ta varia hopi, esun di mas hoben ta entre 13 cu 14 aña di edad. Tambe ta existi comentario cu esaki ta dirigi na hoben so pero esey no ta berdad, hoben y adulto por usa e condonnan aki.

Riba rednan social tabata existi tambe comentario cu e accion aki di partimento ta causa cu hoben por cuminsa nan bida sexual na un edad hopi tempran, tocante esaki Trinidad a comenta cu pa e motibo aki nan a cambia strategia di partimento: “esaki no ta pa stimula e hobennan pa cuminsa nan bida sexual, esaki ta pa traha riba comportamento y mentalidad”, el a sigura.

Trinidad a expresa tambe cu nan ta bay na scol pa ofrece charla informativo na e hobennan y aki el a enfatisa cu hopi scol ta pidi e presentacion cu Famia Planea ta duna y “pa motibo di esaki mi por considera cu tin un cambio di mentalidad tumando lugar”.

Tin hende cu ta mira e tema di bida sexual como un ‘tabu’. Trinidad ta informa cu na e momentonan aki esey no ta pasa mas, nan a yega na mas di 8.300 mucha y hoben cu a haya un presentacion di Famia Planea durante aña 2019, loke ta nifica cu si ta existi e interes pa haya mas informacion.

Pa loke ta trata mayornan nan por a mira un cambio, cu no ta completo ainda pero esey ta biniendo paso pa paso, tambe el a duna di conoce cu tin caso cu e mayornan mes ta hiba nan yiu di entre 15 y 16 di edad pa bira miembro y asina cuminsa bira mas consciente. E hobennan ta haya un charla informativo di kico precisamente nan mester sa y con por maneha nan bida sexual cu prevencion y no haya un malesa ni un embaraso no desea.

Di e malesanan, Trinidad a bisa cu aña pasa tambe den temporada di carnaval nan a lansa un campaña chikito y esey a duna como resultado cu 1 di cada 12 hoben ya caba a keda contagia cu un malesa, segun e cifranan ta indica cu syfilis ta esun di mas halto.

Educacion sexual y integral na Aruba a crece cu 57% segun Trinidad a duna di conoce, pa via di informacion cu ta duna na scol pero tambe nan a mira un crecemento di 22% di hoben mas cu añanan anterior, loke ta nifica cu ya nan sa caba con nan por cuida nan mes y na unda tin cu bay pa haya producto.

E anticonceptivo mas usa entre hobennan y adulto ta e condon, segun Trinidad ta señala y na di dos lugar tin e pildo cu un cantidad di 11.000 pildo reparti na 2019, y na di tres lugar a keda e hangua anticonceptivo .