Durante ultimo dos luna, Famia Planea Aruba a bishita varios scol basico pa asina provee programanan di educacion sexual integral pa zesde klas.
E aña aki e programa di educacion sexual a concentra riba duna nos muchanan informacion tocante pubertad, crecemento, sexualidad, cambionan den curpa, social, emocional y cognitivo, peer-pressure, sexting como tambe concepcion, abstinencia, weganan di sexualidad y prevencion. Tur esaki cu e meta pa informa, educa, guia y ekipa nos muchanan den nan crecemento.
FPA ta mira back na dos luna intensivo y exitoso unda cu a logra bishita un total di 22 scol basico y logra yega na un total di 1290 mucha. FPA kier a gradici tur e scol y docentenan cu a mira e importancia di provee nos muchanan den crecemento cu tur informacion necesario, pa asina nan por tuma decisionnan responsabel pa cu nan curpa, bida y futuro.
Salud Sexual ta un estado di bienestar fisico, mental y social relaciona cu sexualidad y te rekeri un enfoke positivo y respetuoso di sexualidad y di relacion sexual, manera e posibilidad di tin of haya experiencia sexual placentero sigur, liber di discriminacion, violencia y sin forsa nada riba e aspecto di salud sexual.
Manera ta conoci, Famia Planea Aruba (FPA) for di 1970 a cuminsa cu algun miembro of clientenan y servicio, pa awendia nan ta provee anualmente servicio na aproximadamente 4.200 cliente, yegando na 5.250 studiante cu educacion sexual integral, distribuyendo 20.000 producto di anticonceptivo y 150.000 condon pa aña.
Famia Planea Aruba ta traha pa contribui na e metanan di desaroyo sostenibel of metanan global (SDG’s), cual ta completamente adopta pa tur estado miembro di Nacionnan Uni desde 2015, como un yamada di accion universal pa termina cu pobresa, proteha e planeta y sigura cu tur hende ta disfruta di paz y prosperidad pa 2030.
E 17 SDGs ta integra y ta nifica cu nan ta reconoce cu e accion den un area lo afecta e resultado den otro, y e desaroyo ey mester balansa e sostenibilidad social, economico y ambiental. Mediante e promesa pa ‘No Laga Niun Hende Atras’, e paisnan a compromete pa haci prome un progreso rapido pa esunnan cu ta mas atras.
Esaki ta e motibo pakico SDGs ta diseña pa trece e mundo na diferente cambio di bida ‘zeros’, incluyendo cero pobresa, hamber, AIDS y discriminacion contra hende muhe y mucha muhe.
Famia Planea Aruba tambe ta implementa e metanan mundial pa desaroyo sostenibel (SDGs) aki den su servicio-, tayer-, proyecto-, campañanan y tambe e plannan pa futuro, cu e meta pa promove salud sexual en general y anticonceptivo. Di e forma aki Famia Planea Aruba ta haci e comunidad mas consciente di nan salud sexual y motiva tur persona pa haci decisionnan responsabel pa nan bida, curpa y futuro.
Educacion sexual ta brinda e hermentnan pa e hobennan por expresa nan emocion y sentimentonan, pa nan por dicidi cu libertad y responsabilidad na momento di cuminsa tene relacionnan sexual y cu ken, tambe pa evita embaraso no desea y infeccionnan di transmision sexual.
E no mester ta un tarea continuo di duna conseho y advertencia riba loke mester ta of mester haci den e materia aki, sino di loke e mes ta y ta haci. E mester trata di aclaria actitudnan y balornan a traves di hechonan unda e hobennan tin oportunidad di trece dilanti nan idea, dudanan y supera e mitonan; en general pa nan por expresa nan opinion den temanan cu ta afecta nan. E conocemento aki lo sirbi nan pa desaroyo di nan personalidad y pa cumpli cu nan rol di mayornan den futuro.
Ta un proceso di enseñansa di calidad halto riba un variedad amplio di temanan relaciona cu sexualidad y salud reproductivo, unda nan ta explora balornan y creencianan relaciona cu e temanan ey. Na mes momento, educacion sexual ta yuda pa personanan por maneha nan relacion cu nan mes, cu nan pareha, comunidad y cu nan mesun salud sexual.
