E caso penal contra e dos polis sospecha di e morto di Mitch Henriquez a keda posponi ayera. Motibo ta cu den e rapport forensico di parti di e dos polis expertonan a conclui cu e Mitch no a muri door di e ‘nekklem’, pero problema cu su curason.
Famia Henriquez a bin Hulanda specialmente pa tratamento di e caso. Pero na ultimo e caso a keda posponi te dia 6 di april. E abogado di e famia Richard Korver ta bisa nos partner den noticia Ret Karibense na Hulanda, cu e famia a bin ‘por nada’.
“Corte a bisa cu nan kier warda e reaccion di e otro expertonan riba e rapport y asina a dicidi di pospone e caso.” E rapport di parti di e dos polis sospecha ta mustra cu Mitch probablemente a muri door di fayo di su curason. Segun e abogado di e famia nan a entrega e rapport na ultimo. “Corte mes a indica esaki como lamentabel, siguramente pa e famia. Pa motibo cu e famia a biaha por nada y hasta mester tuma liber di trabou, e abogado awor ta haya na su luga cu nan lo haya un compensacion pa e gastonan haci.
Otro casonan
Banda di e caso penal contra e dos polis, tin dos otro casonan den corte. E abogado di e famia a pidi Corte Superior un decision pa forsa Ministerio Publico (OM) di persigui e otro tres polis envolvi tambe. Tambe e famia kier cu Ministerio Publico lo persigui e dos polis menciona pa e echo cu nan no a yuda Mitch Henriquez momento cu e no tabata reaccionando mas. Riba e acusacion aki, OM por pidi hasta un castigo di 9 aña di prizon asina e abogado ta splica. Sinembargo awor OM ta persigui nan solamente pa ta culpabel di su morto, unda hues por duna un castigo di 2 aña maximo. Nan ta spera di haya e sentencia e siman aki ainda.
Fin di siman nan tambe ta spera di haya sentencia den e di tres caso cu e famia a entama pa asina haya e nombernan di tur polis envolvi den e morto di Mitch. “Asina nos mes por investiga e personanan aki, pasobra husticia no a haci esaki.”
