Den cuadro cu caso di e hoben Bruce Arends cu a perde su bida den un accidente di trafico na 2014, e famia a haci un peticion na Ministerio Publico pa start un investigacion nobo. Esaki manera cu nos a trece dilanti anteriormente, ta relaciona cu algun fout den rapport di polis.

“For di cuminsamento nos ta wak cu e spoornan no ta cuadra cu e rapport. Como mayor esey ta nos peticion: un investigacion pero di otro instancia, no for di polis di trafico. Pasobra ora bo wak e rapport, bo ta wak e diferencia entre e potret di forensics”, Vianca Arends, mama di Bruce Arends ta bisa Bon Dia Aruba.

Derecho na investigacion nobo
Fuera di tin tres aña caba ta cana e caminda di cruz aki, e abogado di famia a bolbe haci un peticion pa un investigacion nobo dos luna pasa. Sra. Arends ta bisa cu si esunnan concerni ta para tras di e rapport y a haci nan trabao debidamente, kico ta e problema of miedo pa e caso no bin dilanti? “Laga mi haci mi investigacion anto. Si mi ta yega mesun caminda cu bo, oke. Ami ta un hende cu ora mi haci fout mi ta pidi sorry, pasobra mi no tin miedo di pidi sorry.”

E mayor ta conta nos cu na su parecido nan kier pint’e manera e mama cu no kier acepta anto mester bay un psicologo pasobra e ta loco. “Nos kier un investigacion nobo cual mi tin derecho na dje como mayor. Te awe ta haci tres aña y ningun persona of autoridad a sinta cu mi bisa mi con cos a bay. E unico cos cu mi tin ta un rapport incompleto cu no ta cuadra cu potret di forensics”, sra. Arends ta bisa, agregando cu: “Aki tin algo fout cu nan ta tapando hermeticamente.”

Test di sanger
Sra. Arends ta enfatisa cu un factor grandi den e caso aki ta cu mester a haci test di sanger di e otro chauffeur anto esaki no a pasa. Ultimo biaha cu sra. Arends a papia cu fiscal encarga cu e caso tabata na 2014.  El a priminti sra. Arends un yamada ora cu e haya e rapport cu e no a haci te dia di awe. “Nunca a yama pa duna mi un splicacion pasobra no e no por contesta mi pakico no a haci test di sanger. Como un fiscal, bo ta yega na un cos asina bo ta exigi test di sanger. Mi a puntra na 2015 dicon no a haci test di sanger anto mi a haya manera contesta cu fiscal a saca su conclusion cu ta velocidad halto ta motibo di accident. Bin cu prueba con duro mi yiu tabata core y con el a perde control. Mi ta bisa bon cla, mi no ta dal ni mita stap patras, akinan mi ta keda y mi ta bay dilanti.”

Reaccion di OM
Den luna di juni nos a publica un video riba nos pagina di Facebook Bon Dia 24 di e caso aki caminda cu detayadamente e mama a trece pa dilanti con esaki a cana.
Nos a tuma contacto cu Ministerio Publico pa un reaccion kende a laga sa cu ora di trata keho, Corte Superior ta duna oido na tanto Ministerio Publico como na e persona. E tipo di procedura aki ta bay semper tras di porta cera (procedura articulo 15). Si Corte ta haya cu e decision no ta bon tuma, anto lo duna Ministerio Publico ordo pa haci su trabao di nobo. OM a conclui cu si Corte haya cu e decision ta corecto, anto e decision ta keda manera e ta.
Nos lo ta pendiente cu e abogado di famia Arends pa mas informacion y tambe Ministerio Publico riba e recien peticion aki pa un investigacion nobo.