Recientemente varios medio di comunicacion local a publica e tristo noticia cu un turista hoben, Sergio Nicolas Castillo, cu tabata disfrutando di su vakantie na Aruba hunto cu su pareha y amistadnan, a fayece pa motibo di hogamento na un beach.
Na e momentonan aki, famia di e fayecido ta buscando ayudo financiero pa por manda e curpa of shinishi di e hoben back pa su pais, y pa paga e factura di hospital, cu ta un suma di 20 mil florin.
Ariba pagina di Facebook di e portal di noticia local, Noticia Impacto, e pareha y famia di e fayecido ta conta kico a pasa y kico e situacion ta.
Segun tanto e pareha y e primo di e pareha di e fayecido ta conta, cu tabata oranan di atardi pa anochi ora cu nan a haya e fayecido su curpa pa drif den lama. Nan a sigui conta cu nan a logra reanima e persona na e sitio y ambulance a bin busk’e y hib’e hospital.
Na hospital nan a atende e persona, y pa motibo di su condicion, a ingres’e den e Intensive Care Unit. Lamentablemente e siguiente dia e pareha y familiarnan a ser informa cu Sergio Nicolas Castillo no ta recuperando, cu su cerebro ta hincha y finalmente a fayece atardi.
Aworaki e famia ta enfrenta un factura di 20 mil dollar cu e hospital ta cobrando pa nan servicio brinda, sin conta e costo di manda e curpa of shinishi di e fayecido back pa Colombia.
A storia aki a capta atencion di medionan di comunicacion internacional y varios medio Colombiano a publica e storia y a haci un yamada na compatriotanan Colombiano pa yuda e famia aki pa por trece nan ser keri back pa Colombia.
