E datonan den e celular y computernan confisca di e sobrinonan di presidente Venezolano Nicolás Maduro ta contene evidencia cu integrante di e circulo interno di e famia presidencial ta involucra den operacion di narcotrafico y e informacion devastador, recogi den e ekivalente di 8000 pagina di transcripcion, por keda devela proximamente na publico.
E datonan obteni ta aporta prueba adicional encuanto e presunto participacion di e acusadonan na un red di narcotrafico, e participacion di nan familiarnan den e organisacion aki, e uzo di placa di droga pa financia campaña politico na Venezuela, y incluso orden di mata, emiti na sicario, fuentenan cerca di e caso a bisa El Nuevo Herald.
“Ey tin tur sorto di cos”, un fuente a bisa bao condicion di anonimato. “Ey tin dos o tres aña di comunicacion, y hopi di esey di naturaleza personal. Pero tambe tin tur e parti di narcotrafico y politica, pasobra ey tin con e acusadonan tabata interactua, con tabata financia campaña, con nan tabata opera manera mafia y tin dos sicariato”.
E pruebanan nobo, cu ainda no a keda registra den e sistema electronico di corte, ta laga e teoria di e defensa te na suela, cu e acusadonan tabata solamente empresario hoben cu tabata pone nan prome pasonan den e negoshi di narcotrafico, bao auspicio y engaño di funcionarionan di e Agencia Antidroga di Estadonan Uni (DEA). Pero tambe tin e detayenan di e participacion den e red di narcotrafico di otro integrante di e circulo mas cercano na e pareha presidencial y di integrante di e Casa Militar (custodio presidencial; red.) na Venezuela, di cual algun a keda cita caba pa aparece dilanti e grand jury.
E strategia di e defensa di e sobrinonan –Efraín Campo y Franki Flores– a bin abao diaranson, despues cu e hues cu ta hibando e caso den Corte Federal di Sur di New York a rechasa e solicitud di desestima e combersacionnan graba y e confesionnan cu nan mes a duna y cu ta implica nan directamente den un conspiracion pa coloca 800 kilo di puresa halto na Estadonan Uni.
E decision ey no ta causa sorpresa cerca Félix Jiménez, ken a yega di ocupa e tercer puesto di importancia den DEA prome cu el a retira. “Esaki tabata un caso cu a cuminsa trata na DEA cu masha cautela desde su inicio. A haci tur cos siguiendo e reglanan di buki, precisamente pa percura cu e tipo aki di obhecion cu e defensa a presenta, no por tabatin exito den un corte”, Jiménez a bisa desde Miami.
“DEA, como otro agencianan di investigacion di Estadonan Uni, tin su procedemento di con haci e cosnan aki, cu nan ta ahusta na caminda dependiendo di loke sucede den corte. Y ora nos mira cu tin un fayo encuanto un procedemento, inmediatamente nos ta coregi esey”, el a splica.
E abogadonan di e defensa normalmente sa cu e solicitudnan pa suprimi evidencia recogi pa DEA por lo general ta fracasa, precisamente pasobra e agentenan ta tuma tur precaucion pa protege e caso. Esey, no obstante, no ta impedi cu nan ta intenta di tur manera, manera a sucede cu e caso di e sobrinonan.
Por lo general, e siguiente paso ta busca un acuerdo extrahudicial cu ta hiba nan na declara nan mes culpabel y despues colabora cu e autoridadnan a cambio di un recomendacion pa un sentencia menor. Pero den e caso di e sobrinonan, esey por significa testifica contra nan propio famia.
E Fiscalia Federal di e Distrito Sur di New York ya a cita 18 persona na Venezuela, entre nan tin familiar di Maduro y di su esposa, Cilia Flores, basa riba e pruebanan obteni traves di e celular y computernan cu e sobrinonan tabatin cu nan ora na a aresta nan.
Segun e fuentenan consulta pa El Nuevo Herald, entre esunnan cita tin integrante di e famia inmediato di e pareha cu ta goberna Venezuela, como tambe integrante di e Casa Militar.
“E fiscalia tin un As den su manga. Tempo cu nan a aresta e sobrinonan, nan a kita e laptop, e tabletnan y nan telefonnan for di nan. Y nan a caba di ricibi e informe forense”, un di e fuentenan cercano di e caso a relata.
“Nan tin tur e transcripcionnan di tur loke nan a haci a traves di e telefonnan, cu ta seis en total, pasobra cada un di nan tabatin tres, ademas di e iPads y un computer”, el a agrega.
Campo y Flores, cu a ser cria manera yiu pa Maduro y su esposa Cilia Flores, a ser aresta dia 10 di november di 2015 na Haiti y actualmente ta ser acusa den Corte Federal di Distrito Sur di New York di conspira pa importa 800 kilo di cocaina di puresa halto na Estadonan Uni.
