Ministerio Publico na Hulanda a dicidi di persigui 2 di e 5 polis sospecha den e morto di Mitch Henriquez (42). E acusacion ta homicidio sea culpabel di causa un morto. Pues esaki a cambia: prome e tabata maltrato cu consecuencia fatal.
E famia di Henriquez ta desapunta cu e decision di Ministerio Publico. Nan kier cu tur 5 polis lo bay dilanti corte. “Nan tur tabata presente, pues mi te kere cu nan tur ta responsabel”, e ruman muhe Lila Henriquez ta bisa na e fuente Hulandes NOS. E hunto cu mama Maria ta na Hulanda aworaki.
Nan abogado tambe ta haya cu nan mester trece e otro 3 polis tambe dilanti corte pasobra nan no actua durante e detencion bruto di Henriquez y yuda wanta e Arubano abou. Cual tambe ta un acto di violencia, segun e abogado.
Polis ta informa cu e 3 cu a scapa un proceso penal, no ta sali liber. Contra nan ta core un investigacion disciplinario ainda y esaki tambe tin su consecuencianan pa nan.
Motivacion
Segun Ministerio Publico di Hulanda lo persigui solamente e 2 polis di cual uno a klem Henriquez su garganta y e otro cu a uza pepperspray den su cara. Lo no persigui e otro 3 polis pasobra no tin prueba cu nan accion a contribui na e morto di Henriquez.
E hefe di polis di Den Haag ( e ciudad unda de detencion a tuma luga), esta Paul van Musscher a reaccion den un video riba e website di polis Hulandes, riba e decision aki. “E caso aki ta touch e complicidad di e trabou (di polis). Nos mester pone pasonan dilanti y actua si ta necesario. Esey ta locual e comunidad kier di nos. Nos tin e monopolio riba violencia y e ta algo grandi cu nos por midi e accion di polis den un forma critico si mester.”
