Cu protestanan contra brutalidad di polis tumando luga na varios ciudad rond mundo, e caso di e Arubiano Mitch Henriquez, kende a fayece na Hulanda den custodia di polis cinco aña pasa, a haya prominencia un biaha mas.
Segun un relato di reportero Leoni Schenk pa e portal noticiero retkaribense, e ultimo cinco aña den cual famia di Henriquez a keda completamente exhausto mental- y financieramente pa motibo di casonan den corte. Lila Henriquez, ruman muhe di Mitch, a bin cu un iniciativa pa recauda fondo pa sigui busca husticia den e caso aki.
E problema principal ta cu mientras a reconoce cu a usa exceso di forsa den e aresto di Mitch, ‘casi tur polis a keda exonera’, segun Lila.
Durante e protestanan di Black Lives Matter recientemente na Hulanda, por a mira algun borchi cu nomber di Mitch Henriquez, treciendo atencion na su caso un biaha mas. Esaki pasobra ta mira e caso di Mitch como un caso di profilacion racial. Jair Schalkwijk di e grupo Control Alt Delete ta mira similaridadnan entre e caso di Mitch Henriquez y esun di George Floyd na Merca. “Tur dos tabata homber color scur, sin arma y riba ningun manera tabata menasante pa polis y publico.” Lila ta comparti e mesun opinion. “Ta dificil pa prueba, pero mi ta kere cu Mitch su color y accent a pone e polisnan actua mas agresivo. Mi ta kere cu si tabata un Hulandes blanco e cos no lo a caba asina.”
Lila a conta retkaribense cu mientras tanto, nan ta sigui busca husticia, pero e caso ta dura demasiado largo, cu hopi consecuencia economico. “Mi a bay biba cerca mi mama y huur mi cas”, el a declara.
Aunke no a mira husticia den e caso aki ainda pa famia Henriquez, nan abogado, Richard Korver a bisa cu ya ta inusual cu e caso aki a hiba polis dilanti hues. “Ta masha special cu e caso aki a yega asina leu.” Korver a comenta cu e ta haci tur cos pro deo, y tambe a pone di su propio placa den e caso, den cual a contrata detective pa investiga e caso. Korver a cuminsa un segundo procedura di articulo 12 – un keho formal na momento cu no ta persigui hechonan castigabel – despues cu corte a duna veredicto cu por persigui e cuatro polis cu a sali liber door di keda sin duna ayudo, pero fiscal a duna declaracion di no tin intencion di persigui e otro polisnan. Korver tambe a acudi na Corte Europeo pa Derechonan Humano, cu awo mester haci un investigacion.
E agente cu a tene Mitch na su nek, a ricibi condena di seis luna condicional. El a bay den casacion.
Famia di Mitch Henriquez ta organisa un conrmemoracion na Aruba y Hulanda dia 28 di juni proximo.
