(Reuters) – Amigo y famia di Venezolanonan deporta for di Merca pa un prizon di seguridad maximo na El Salvador a tene un vigilia dilanti di muralnan colorido di e caranan di nan sernan keri pinta den caya di Caracas, pidiendo pa un proceso debido despues cu Merca a acusa nan di ta miembro di gang.
Paola Paiva a conta Reuters cu su ruman homber Arturo Suarez tabata un cantante. Su casa a bisa medionan local cu el a bay Merca pa desaroyasu carera musical.
“Mester hiba e proceso debido,” Paiva a bisa. “Nos no sa kico ta pasando cune. Esaki ta practicamente un secuestro. Nos no a tende ningun noticia di mi ruman pa 16 dia.”
Suarez a ser deteni dia 8 di februari pa oficialnan di Inmigracion y Duana (ICE) cu a invadi un cas na North Carolina unda e tabata trahando un video musical cu Darwin Hernandez, un barbero, y ruman di Hernandez, segun Aida Diaz, casa di Darwin Hernandez.
Diaz a bisa cu su casa a bis’e prome cu el a ser deporta cu el a pidi’e pa firma un papel cu ta bisa cu e ta miembro di Tren de Aragua, pero el a marca ‘no’. El a bisa cu el a realisa cu el a ser manda pa El Salvador despues cu su nomber a aparece riba un lista di esnan deporta cu CBS a publica.
Tanto Paiva como Diaz a bisa cu nan sernan keri no tabatin antecedente penal na ningun pais. Reuters a mira prueba cu Hernandez no tabatin antecedente penal na Venezuela pero no por a verifica independientemente antecedente mas leu cu esey.
ICE no a responde mesora na un peticion pa comentario riba ningun di dos caso.
Gobierno di Merca a bisa cu tur e Venezolanonan cu nan a deporta tabata miembro di e gang Tren de Aragua, pero abogadonan y activistanan a desafia esaki. Un oficial di ICE huramenta luna pasa a bisa den un declaracion cu hopi no tabatin antecedente penal di Merca.
Merca a reconoce cu un homber Salvadoreño a ser deporta y manda pa e prizon eroneamente pero a bisa cu e no tin autoridad legal pa trec’e back.
