Update; cantidad di persona abordo no ta 10, pero 9. Lesa nan nomber aki.
Famia di e 10 persona riba e boto La Rumbera cu ta perdi desdi diahuebs a pidi ayudo den un conferencia di prensa diabierna anochi. Bou di e personanan tin 7 homber y 3 muhe, esun mas chikito ta un mucha muhe di 16 aña. Abogado Chris Lejuez ta un di e famia afecta, esta cu tata di su 2 nieto ta abordo.
Durante un conferencia cu a tuma luga ayera anochi na Varadero, famianan di e personanan perdi riba lama a duna informacion tocante loke a sosode cu nan sernan keri. Nan a splica cu e boto “La Rumbera” cu a sali for di Barcadera cu destino final “Las Piedras”, Venezuela cu 10 persona na bordo, 7 hende homber y 3 muhe incluyendo e capitan ta perdi riba lama pa mas di 24 ora caba. 8 di nan ta Arubiano y dos persona di nacionalidad Venezolano. E boto a sali antayera 5or di atardi y ultimo contacto cu tabata tin cu e boto a wordo ricibi den careda di 10or di anochi via whatsapp pidiendo ayudo pa motibo cu e dos motor di e boto no tabata funciona bon y p’esey e boto tabata drif. Segun un di e famianan presente na e conferencia, e mensahe a bisa textualmente : “Manda hende yuda nos”. Na e momento ey tur e contacto cu e persona na bordo a wordo perdi. Segun informacion entrega durante e conferencia, entre e personanan na bordo tin un mucha muhe di 16 aña. Mayoria di nan ta tata cu mama di famia y muchanan jong.
E motibo di e biahe riba boto tabata entre otro pa bishita famia y amigonan na Venezuela. E duracion di e biahe aki ta di 1or y mey aproximadamente. Un di e familiarnan di e personanan perdi a declara den e conferencia di prensa cu e autoridadnan competente di Aruba manera Warda nos Costa no a reacciona inmediatamente pa bay busca e boto cu e 10 persona na bordo. “Nos no ta hayando nada di nan banda, ni di Warda nos costa ni Polis. Nan kier wanta nos atras. Marduga ora ma yama nan pa bisa Warda nos Costa pa bay cu mi pa busca nan, nan a bisa mi cu no, pa motibo cu nan ta den awa di Venezuela. Mañan mi ta bay mi so”, asina el a enfatisa. “Nos ta tratando e posibilidad pa habri telefonnan di e hendenan na bordo. Mi tin entendi cu gobierno tin un reserva ora tin calamidadnan y mi ta considera esaki como un calamidad. P’esey mi ta haci un peticion na gobierno pa haci uzo di e reserva ey”, asina abogado Chris Lejuez, a bisa. Mester bisa cu e tata di dos nieto di abogado Lejuez ta riba e boto perdi.
Tin varios autoridad maritimo colaborando cu e buskeda entre otro, autoridadnan di Curaçao, Venezuela, Merca y Colombia. Un suplica a bay pa tur e instancianan concerni incluyendo gobierno pa haci tur lo posibel pa considera esaki como un situacion hopi grave y busca mas ayudo . Segun famianan di e personanan perdi riba lama, actualmente tin contacto cu e consul di Venezuela, ken a afirma cu e buskeda riba teritorio Venezolano a cuminsa caba y cu nan lo bay haci tur lo posibel pa pone avionnan disponibel pa mañan mainta. Durante e conferencia, voceronan a señala cu te na e momento ey tur e gastonan ta saliendo for di nan saco y p’esey nan ta pidi apoyo di gobierno urgentemente.
