Pedro Werleman di 29 aña di edad ta un persona cu for di 17 di mei ultimo ta desapareci na Aruba. Diferente medio di comunicacion a reporta su desaparicion y te ainda su famia ta den su buskeda.

Den un entrevista cu su ruman, Robert Werleman a tene cu medio di comunicacion Noticia Impacto, el a informa cu su ruman ta sufri di schizofrenia y nan no sa precies si Pedro a sali y bay for di cas pa no bin mas. Segun su ruman a conta, Pedro a sali cu un tas y despues Polis a haya e mesun su tas cerca di hotel Marriott.

For di e dia ey nan a cuminsa busca Pedro den e area ey y Robert a splica cu su ruman no tin nada di paña of cuminda pa e por keda afo di cas varios dia. Tampoco tin un telefon na unda su famia por comunica cune.

“E mester bebe su pildonan, tin mas di ocho dia cu e no ta bebe su remedinan y nos ta hopi preocupa. Nos a buskele na varios parti, nos a reparti flyers y nos a haci diferente post online pa hende por yuda nos si ta logra wake algun caminda,” Robert a señala.

Dia cu Pedro a sali for di su cas e tabatin un T-shirt blauw bisti.

Su ruman Robert a splica cu Pedro ta un persona trankil, pero na e momentonan aki e por ta pasando algun momento dificil debi cu no ta tumando su medicamento y por tin pensamentonan fuerte. Ta p’esey e ta pidi ayudo di comunidad si na algun momento ta wak Pedro algun caminda pa por avisa na su famia.

Esaki no ta prome biaha cu Pedro ta bay for di cas. Su ruman Robert a conta cu recientemente el a bay for di cas den e mesun situacion y nan a hayele tres dia despues na lama den area di Fisherman’s Hut.

Tin biaha e tabata bay supermercado su so, pero su ruman ta conta cu e no ta gusta sali y tampoco tin amigonan na unda Pedro por a bay cerca nan.

Nan como famia a buskele na diferente area, a puntra na varios hende cu segun a wak Pedro canando algun luga incluyendo Ponton cu ta e bario unda e ta biba, pero nan no por haya Pedro ni un caminda.

Si algun persona por wak Pedro Werleman pa por fabor yama na e siguiente numbernan di telefon y contact su famia: 747-0302, 563-9972 y 742-8542.