Famia Colombiano tira morto kier indemnisacion moral y material di Aruba

Despues di 6 aña di un proceso huridico largo e famianan di Alcides Peralta y Benjamin Castro ta spera cu e aña aki e dos casonan cu nan a entabla, tanto civil como penal, lo wordo resolvi.

Nan ta e dos Colombianonan cu a muri durante un accion anti droga realisa pa e team di aresto di cuerpo policial na Renaissance Marketplace. E luna aki e fayo den e caso civil mester cay; y alrededor di luna di juni lo wordo conoci e veredicto riba e otro caso penal.

E incidente a sosode ora cu den cayente di e accion aki un tiro los accidentalmente for di un arma di candela di un polis. Di biaha e otro miembronan di polis a reacciona bashando un cantidad di tiro riba e vehiculo ocupa pa Peralta y Castro. Un investigacion posterior a mustra cu niun di e dos personanan aki tabatin arma di candela.

Casonan
Angelo Peralta kende ta yiu di Alcides Peralta hunto cu nan abogado David Kock a percura pa sigui cu ambos caso aki. Inicialmente nan a cuminsa un caso civil, caminda e veredicto di prome instancia di corte di Aruba a faya na nan fabor. E veredicto aki a reconoce cu tabatin fayo den e accion policial aki. Igualmente e fayo di hues tabata reconoce algun indemnisacion di tipo material y no material. Ademas di algun gastonan di entiero cu e famianan tabatin durante e proceso di repatria e curpanan aki.

E gobierno pa medio di Ministerio Publico a apela e decision aki. Esaki ta e procedura cu normalmente gobierno ta adopta den un caso asina. Actualmente e caso aki ta den corte di casacion di ultimo instancia na Hulanda. Prome cu fin di luna aki nan ta spera un fayo. E veredicto mester a cay na december ultimo. Pero el a wordo extendi pa e luna aki.

Tambe gobierno a considera cu e caso aki ta uno penal y no civil. P’esey e otro proceso cu ta andando ta penal. Angelo Peralta a indica cu nan ta masha interesa riba e caso aki pa asina e personanan responsabel por haya un castigo ehemplar. “Te dia di awe e hendenan aki ta sigui liber. Tambe pa informacion cu nos por a haya, e personanan ta sigui ocupa nan puestonan di trabou.” Nan no a haya niun sancion, y tampoco nan no a confronta un proceso disciplinario, el a bisa na Bon Dia Aruba.

Falta colaboracion minister
Nan ta considera cu e proceso aki a bira largo, ya cu dia 22 di februari ultimo nan a recorda 6 aña di e tragedia aki pa nan famianan. Segun Angelo Peralta e proceso aki a bira largo debi na e falta di colaboracion di e minister di Husticia di e gobierno anterior. Nan ta haya cu ex minister Arthur Dowers tabatin practicamente un ‘enfrentamento personal contra nos famianan’.

Bon Dia Aruba a acerca ex minister Dowers kende a prefera di abstene di no duna mayor comentario riba e caso aki. Segun Peralta nan tin speransa cu awor cu Aruba tin un minister di husticia nobo, finalmente e casonan aki lo wordo soluciona di e forma mas lihe. “Hopi biaha nos a pidi pa ambos parti bin na conciliacion, pero nos no a wordo scucha. Nan a prefera pa tur cos cana su caminda legal.”

Indemnisacion
El a bisa cu nan famia semper a pidi un ‘indemnisacion moral’. Nan no a scucha for di gobierno un disculpa publico y formal di un representante di nan caminda nan ta acepta cu fayo a wordo cometi durante e accion policial aki. “Prome minister Mike Eman a haci’e den su oficina y na porta cera,” el a bisa. E ta haya cu un disculpa ta necesario, ya cu ‘no tin pordon sin olvido, pero no tin olvido sin pordon’.

Tambe nan ta spera un indemnisacion economico. E cifra di indemnisacion aki mester bini for di hendenan experto. “Nos no ta pidi nada irasonabel sino husto.” El a bisa cu tanto Alcides como Benjamin a muri na edad relativamente jong. Un mas cu otro y nan expectativa di bida tabata largo ainda. Nan tabata hendenan productivo y cu nan morto nan a laga di produci recursonan economico pa mantencion di nan famia. Na nivel huridico e factor aki ta wordo evalua pa determina un indemnisacion material.

Tanto Alcides como Benjamin tabatin dos taki di famia y nan a laga atras yiunan menor di edad cu awendia, ya casi nan ta birando mayor di edad. Durante e añanan aki cu nan a keda huerfano nan a confronta diferente problema no solamente financiero sino psicologico. “Nos ta spera cu e situacion aki lo wordo soluciona pronto pa asina nos por cera e capitulo aki di nos bida,” asina Angelo Peralta a declara.