Un famia na Tanki Leendert ta cansa cu criadero grandi di sangura cu tin banda di nan cas. E famia tin miedo di malesa anto a entrega keho caba pero segun nan ta informa Bon Dia Aruba, nan tin molester di esaki pa tres aña caba y ainda nada a wordo haci.
Habitantenan den caya di Felicidad 33 na Tanki Leendert ta bisa Bon Dia Aruba cu tin un piscina bashi pa tres aña caba cu a bira un criadero grandi di sangura. E famia ta splica Bon Dia Aruba cu nan bisiña tin un negoshi di duna zwemles. Tin un piscina basta grandi cu ta wordo uza pa duna mucha zwemles pero net banda di dje tin un otro piscina bashi cu no ta wordo uza. E piscina aki ta actualmente yena cu awa di awasero anto segun e famia, nan tin demasiado molester di sangura anto ta sospecha cu tin criadero eyden. E famia ta bisa Bon Dia Aruba cu nan a entrega keho caba na Gele Koorts en Muskieten Bestrijding (GKMB) y ta sperando un bishita di nan.
Bon Dia Aruba a tuma contacto cu e doño di e propiedad kende ta bisa: “Nos no tin ningun molester di sangura akinan. Ta awo e piscina ta yena cu awa paso awa ta yobiendo pero normalmente e ta bashi.”
E doño di e propiedad ta sigui bisa cu e piscina tin tres aña caba eynan anto no ta wordo uza pasobra esaki a wordo poni pa duna les pa baby anto e idea no a resulta. E piscina tin pues basta tempo eynan sin nada pa tap’e anto evita awa pa drenta den dje. E doño ta bisa cu: “E instructor ta buscando un pida tereno pa muda su piscina anto e tin cu bin cu un solucion pa e babynan por wanta e les. Mi a ripara esaki den noticia tambe cu un hende a saca un potret di e piscina pero e awa cu tin den dje ta di e luna aki cu awasero a cay. Nos no tin criadero eynan” e doño ta splica.
