Famia Bencosme Ortiz tin su “dudanan rasonabel” riba Mia su morto

 Ayera tabata e dia cu Mia Bencosme tabata wardando cu hopi emocion y alegria, ya cu e mester a biaha pa celebra Pasco y fin di aña cu su famia, y cuminsa un bida nobo como studiante na Republica Dominicana. Pero destino a mustra otro cos. Diasabra ultimo den oranan di traimerdia e hoben aki di apenas 20 aña a wordo haya morto den su cas na Tanki Leendert. Aunke ta wordo papia cu el a comete suicidio, sra. Delia Josefina Ortiz, kende ta mama di Mia y Abogado di profesion, ta afirma cu e tin su “dudanan rasonabel” pa pensa cu su yiu no por a mata su mes.

Investigacion

Dialuna ultimo y despues di un fin di siman tras di lomba, Ministerio Publico (OM) a informa cu no tin sospecho cu no tabata un suicidio. P’esey e ta solicita respetuosamente na nomber di su famia, pa bin un investigacion mas riguroso rond di e caso di su yiu Mia. Sra. Delia Ortiz a laga sa cu nan tin tur confiansa den e sistema hudicial y policial di Aruba, manera nan a yega di expresa den un carta habri publica den prensa local diamars ultimo. Nan no kier pa OM cera e caso aki gewoon como un suicidio, mientras cu tin dudanan rasonabel cu nan ta considera cu un investigacion mas profundo lo mester aclaria debidamente.

Sra. Delia Ortiz no ta haya motibo pa su yiu muhe atenta contra su propio bida. E ta haya cu su Mia stima tabata un mucha muhe feliz y cu plannan ambicioso pa su bida futuro. Ademas e tabata un gran deportista di Karate, kende a yega di representa Aruba den competencia internacional na Venezuela. Tampoco e tabata sufri di depresion te hasta su doctor di cas a confirma esaki cerca nan.

P’esey e famia Bencosme Ortiz a podera un abogado pa solicita cu OM por bay mas leu cu su investigacion, ya cu nan tin “dudanan rasonabel” pa pensa cu loke a sosode cu Mia no tabata un suicidio. Te hasta nan ta di acuerdo pa realisa un autopsia forence cu lo por yuda den e proceso di investigacion di e caso aki.

Dudanan

Un di e dudanan cu nan tin ta relaciona cu e ultimo persona cu Mia tabatin contacto cu ne. Ya cu e ta e mesun persona cu supuestamente a hay’e horca. “E persona aki tabata e ultimo cu a wak mi yiu na bida y esun prome cu a haya mi yiu morto”, el a bisa. El a splica cu e persona aki no a yama autoridadnan competente mesora, tampoco Mia su famia ora cu el a haya e curpa di dje. Sino cu el a baha e curpa fei e sitio, caminda supuestamente e hoben a wordo horca su mes, y el a yama su tata, enbes di e autoridadnan competente of un miembro di e famia di e victima. El a bisa cu como Abogado e sa cu bou luz di Derecho, logicamente e persona aki ta e prome sospechoso y mester wordo interoga rigurosamente. Sra. Delia Ortiz a bisa cu su famia no kier tira culpa riba niun hende, locual nan kier ta pa e dudanan cu nan tin lo wordo aclaria. Y esaki ta un di nan. Otro duda tin di haber cu sra. Ortiz a relata cu e tabatin contacto cu su yiu via WhatsApp, tres ora prome cu Mia a wordo haya morto, y niun momento su yiu muhe a expresa nada abnormal. E ultimo mensahe cu el a ricibi fei Mia tabata bisa: “Te amo te amo”.  El a relata cu den oranan di merdia bisiñanan a tende un discusion den e cas; y un rato despues Mia a wordo haya morto pa su partner cu pa un aña y mey caba e tabatin relacion cu ne, y cu nan tabata biba hunto. Otro duda cu e famia Bencosme Ortiz tin ta relaciona cu un plat di pishi di e victima a wordo haya riba un sofa fei un distancia considerabel unda supuestamente e curpa a wordo haya horca. Con esaki lo por sosode?, nan ta puntra nan mes. Nan a consulta un Patologo cu a bisa nan cu ta normal cu un persona cu ta horca su culpa ta pishi su mes 3 minuut despues di e acto aki.

Esakinan ta algun di e dudanan cu famia di e hoben Mia Bencosme Ortiz ta considera como “dudanan rasonabel” cu nan a yega di expresa formalmente via nan abogado pa nos sistema hudicial tene cuenta cu nan, y asina un investigacion mas profundo lo por sigui rond di Mia su morto.