Ayera mainta, Departamento di Impuesto a haci un yamado na comunidad pa cumpli cu e pago di impuesto di vehiculo di motor, ya cu mañan 31 di januari ta e ultimo dia pa paga por lo menos e prome mita di aña 2024, sin cu e persona mester haya un boet.

Meverly Romano, ken ta fungi como vocero di Departamento di Impuesto (DIMP), a recorda riba e importancia di paga impuesto pa vehiculo di motor, ya cu manera el a sigura, nan tin basta automobilista cu no ta haci nan pago di impuesto na tempo; y segun ley, e deadline ta mañan 31 di januari y dia 30 di juni.

“Nos ta yegando na e fecha y ta hopi importante pa tur automobilista y motociclista sa cu esaki ta algo cu mester tene na cuenta cune,” el a sigura.

Despues cu 31 di januari, pa esnan cu no a cumpli cu por lo menos e pago di mita di aña 2024, nan sistema lo traha e boetnan cu ta representa 50% di e suma cu no a paga.

Cifranan di aña 2023

Romano a splica cu nan a cera aña 2023 cu 89.827 vehiculo di motor registra na Aruba, 84% di automobilistanan a cumpli cu e pago di impuesto y 14% no a cumpli, sea cu no a paga completamente of a paga mita di aña so y 2% a entrega nan plachi di number.

E total di incumplimento pa 2023 ta di 12.912, di cual 8.445 plachi number cu no a paga nadadi e impuesto aki y 4.467 si a paga un parti.

Esaki ta nifica cu e 12.912 plachi number aki cu no tin pago, e automobilista lo mester bay paga e impuesto di aña 2023 prome cu nan lo ser permiti pa paga impuesto di aña 2024.

Cifranan di aña 2024

Pa loke ta trata cifranan di e aña aki, 89.832 vehiculo di motor ta registra y te ayera 21% di e contribuyentenan a cumpli cu pago di impuesto, loke ta nifica 18.371 contribuyente a cumpli caba. 79% di automobilistanan te ayera no a cumpli cu e pago di por lo menos, e prome parti di aña 2024.

Pa esnan cu mester haci nan pago te ainda, Romano a afirma cu nan oficinanan ta yen y nan ta recomenda pa haci e pago online via banco, debi cu ta mas facil, sigur y nan ta haya e datonan na tempo. Nan ta enfatisa y adverti cu transaccion di banco cu ta ser haci dia 31 di januari atardi ta bay ser procesa riba e siguiente dia 1 di februari , kiermen cu e contribuyente ta bay haya boet.

Romano a sigura cu e aña aki nan no ta bay hala e fecha di e pago. Nan ta wak riba rednan social cu algun ciudadano ta bisa cu DIMP ta bay hala e fecha, pero esey no ta berdad. “Antes esey a sucede, pero actualmente nos ta tene nos mes na e fecha cu ley ta bisa y esey ta 31 di januari,” el a sigura.

Contribuyentenan cu tin debe atrasa

Pa esnan cu tin debe atrasa te cu aña 2023, Romano a declara cu ta posibel pa haci un areglo di paga te cu aña 2022; na esnan cu no tin areglo di pago, DIMP na dado momento lo cuminsa forsa e cobramento.

Tin cierto comentario den comunidad cu ta indica cu debi cu DIMP no a haci cambio den color di e plachi number, tin hende cu ta probecha di esey pa no paga e impuesto y cumplimento ta bay ta miho. Sinembargo, director di DIMP, Luenne Gomez-Pieters a señala cu nan no a mira esey den cifranan. “Nos por otorga un plachi number tur kwartaal mes, e ta keda na e comportamento di pago di e contribuyente. Esey tin algun trigger, si bo sa cu na januari bo seguro di auto ta vence, bo mester sa caba cu pa december bo mester tin e cen reserva pa bo por cumpli. E plachi number a scoge pa cambia nan cada cierto tempo durante cada cinco aña, si ta cambia di plachi di number tur aña e ta susha nos isla. Y eigenlijk nos kier ta mas sostenibel ora ta trata di plachi number, pasobra e plachi ta e trigger pa e pago, ta e comportamento di e contribuyente cu e sa cu ta tur aña e tin e mesun impuesto di vehiculo di motor pa paga.”

Cuerpo Policial ta haciendo control caba riba caya

Vocero di Cuerpo Policial, Liliana Rasmijn a sigura cu Cuerpo Policial di Aruba ya caba tin tempo ta haciendo control riba caya, pero na e momentonan aki cu nan tin e cifranan nan lo duna e informacion na straatdienst y nan lo pone un tiki mas atencion riba control di auto riba caya.

“Durante dia, no tin un momento specifico cu tur polis ta subi caya, e ta cada dos ora cu patruyanan ta sali 24/7 polis ta disponibel riba caya, na unda nan ta controla tanto luga, no tin un dia specifico ni orario,” el a sigura.

Pero no ta solamente impuesto loke no ta ser paga sino seguro tambe, na unda nan como polis tur dia nan ta parti boet y esey ta nifica cu incumplimento ta basta halto. “Nos mester cuminsa conscientisa un tiki mas, bay un areglo di pago, wak kico por haci pa evita e boet tanto di impuesto como di polis,” Rasmijn.

Ministerio Publico ta e instancia encarga di coloca e suma di e boet, manera Rasmijn a declara, polis ta duna un OPV na e persona y despues e por acudi te Ministerio Publico pa pag’e of haci un areglo di pago, esey ta depende di cada departamento nan maneho.