Ayera mainta vocero di Departamento di Impuesto di Aruba, Meverly Romano a duna di conoce cu ta falta poco dia pa 28 di februari, fecha limite pa pago di impuesto di vehiculo di motor, y cu 53% so di e numbernan registra a cumpli cu e pago aki.

Romano den un conferencia di prensa a ofrece un actualisacion di e situacion na e momentonan aki y a declara cu segun ley, e fecha ultimo pa paga por lo menos mita aña di impuesto di vehiculo tabata 31 di januari. Manera comunidad sa gobierno a extende e periodo te dia 28 di februari cu ta e fecha final.

Te na e momentonan aki, Romano a bisa cu di 88.730 number cu tin registra tin e cumplimento di pago di 53%. Di esaki 40% a paga impuesto di henter e aña y 13% a paga mita aña so.

Tocante esaki, Romano a menciona cu mirando e periodo cu nan tin aden y e cantidad di number cu ta falta pa paga, e cantidad di pago ainda ta hopi abou.

El a trece dilanti cu 39.731 plachi di number no tin niun pago registra riba nan, loke ta representa 45% di e total cu tin registra. E categoria mas grandi di incumplimento ta keda e plachi number ‘A’ cu un total di 34.685 cu no tin niun pago registra.

Romano, a splica cu posiblemente e grupo aki no tin añanan anterior paga y pa e motibo aki nan no lo por paga 2019. Esaki ta representa un grupo hopi grandi y cu hunto e otro categoria ta yega na 39.731.

2% no tin pago registra pero esaki ta representa e personanan cu a entrega nan plachi di number, posiblemente nan auto no ta den uso y no mester paga e belasting.

Di mesun manera, el a señala cu mirando e cantidad di dia cu ta falta pa e fecha final y e cantidad di plachi di number cu te ainda no a ser paga, e departamento den dianan aki lo bay ta sumamente druk. Un parti por paga via banco, pero si por mira e averahe di e cantidad di dianan cu tin, ta yega te mas di 5.000 number cu lo mester paga pa dia, si e cumplimento ainda lo sucede pa dia 28 proximo.

Tocante esaki, Romano a manifesta cu ‘si dos mil persona yega na Camacuri of otro oficina di DIMP nos no por atende e cantidad ey pa dia’. Esaki lo keda un hecho cu nan no por duna un cantidad halto di number pa e clientenan cu acudi, pa motibo cu nan tin cu tene cuenta cu siguridad tambe. El a sigura cu nan no por tin 1.000 persona den departamento, den algun momento mester stop di duna number pa asina por cumpli cu e personanan.

Den sala mayoria di biaha ta purba mantene entre 250 pa 300 cliente pa atende pa dia. Si ta alcansa e cantidad ey lo bira un situacion caminda tin cu cera e mashin di duna number y e hende, maske yega den orario di trabou, no lo por haya number.

El a enfatisa y recomenda pa e comunidad pa haci nan pago online via banco, segun e mes a comenta ‘ta facil, ta sigur y e persona lo por haci ki ora cu ta’.

E pagonan cu departamento lo haya despues di dia 28 di februari lo haya boet di 50%. P’esey esunnan cu lo desea paga via banco mester haci na tempo y no warda te dia 28 di februari. Tambe a declara pa esunnan cu ta prefera paga online cu Banco di Caribe of Aruba Bank nan pago ta wordo procesa automaticamente den nan sistema.

Yegada di plachinan di number.
Di loke ta trata e reparticion di e plachinan, Romano a comenta cu e barco cu ta trece nan a yega Panama y proximamente lo yega Aruba e siman aki. “Nos ta pensa cu den e prome dos siman di maart nos lo por cuminsa parti e plachinan.”

Despues cu e barco yega Aduana lo sigui cu e control si tur e plachi t’ey, y despues lo cuminsa prepara pa partinan.

Parti plachinan.
Romano a informa cu pa reparticion di e plachinan tin plania pa bin cu un sistema di ‘delivery service’ pero te ainda no ta sigur, loke ta nifica cu e plachinan lo wordo entrega na cas of luga di trabou. A papia cu companianan di seguro, pero tambe tin cu wak con por traha miho riba e parti aki y ademas no lo haci entrega di e plachi tanten e seguro no ta na ordo.

“E servicio di delivery no lo ta obligatorio ni gratis, ta solamente algo si e persona desea”, el a finalisa.