For di ayera atardi delegacionnan di Venezuela y Reino a reuni cu gabinete Wever-Croes pa asina habri dialogo riba situacion di contrabanda entre islanan ABC. E aspecto di migracion ilegal na y relacionnan entre Reino y nos pais bisiña lo a wordo trata tambe. Nos a papia cu un grupo di turistanan Venezolano wardado riba e resultado di e reunion pa asina nan duna nan punto di bista riba e asunto.

A plania e reunion aki despues cu presidente di Venezuela Nicolás Maduro a pone un fin na trafico aereo y maritimo entre nos pais bisiña y islanan ABC. E mandatario via television Venezolano a anuncia siman pasa durante weekend cu frontera entre e paisnan lo wordo cera pa asina trece atencion na e problema di contrabanda di diferente producto cual ta inclui koper y shampoo. E medida cu autoridadnan Venezolano a tuma di manera unilateral a perhudica tanto residentenan local como ciudadanonan Hulandes pa por bin Aruba bek.

Sinembargo despues di a negocia via canalnan diplomatico autoridadnan di nos pais bisiña a bay di acuerdo pa laga cierto vuelonan pasa. E vuelonan aki minister di transporte Chris Romero a regla via canalnan na Directie Luchtvaart conhuntamente cu Instituto Nacional di Aeronautica Civil na Venezuela. Aunke cu mayoria di nos residentenan a yega caba via e canalnan aki nos a confirma cu sr. Romero su oficina cu falta 1 vuelo pa yega. Nos no por a confirma ki dia e vuelo lo yega ni di cua ciudad lo e ta biniendo.

Bon Dia Aruba tabata presente ora cu delegadonan tabata iniciando e reunion na Bestuurskantoor, mientrastanto nos a tuma nota di teamnan chikito di Cuerpo Policial para pafo di e oficina di gobierno na diferente puntonan strategico. Un unidad di 3 agente policial dilanti Cosecha, un dilanti Fort Zoutman y un dilanti Bestuurskantoor mes. E reunion tabata entre embahador di Hulanda sr. Braakhuis, vice presidente y minister di Comercio di Venezuela sr. Mora, minister di Husticia sr. Girigorie y prome minister di Aruba, Evelyn Wever-Croes.

E mandatarionan di e diferente paisnan tabata dialoga di manera extenso na e ultimo piso di Cocolishi. E parhanan preto cu tabata circula na laira rond di Bestuurskantoor a casi refleha e trahadonan di gabinete cu tabata sali un pa un mientras solo tabata preparando pa baha. Tur esaki a contribui na loke a parce di afo pa ta un reunion bastante intenso, sinembargo cu e meta pa normalisa e relacionnan y tension entre e islanan y Venezuela.

Venezolano riba e situacion
Mientras nos tabata warda pa un posibel briefing Bon Dia Aruba a dicidi di papia cu un famia Venezolano cu tabata disfrutando di un lunch na Seaport Marketplace. Despues di a puntra un persona den famia si nan ta na altura di e reunion tumando luga actualmente entre e paisnan bisiña, nan a confirma cu nan ta consciente di esaki.

Di punto di bista di e turista Venezolano, e medidanan cu a wordo tuma di parti di autoridadnan Venezolano ta na su luga. E problema central segun e turista ta cu materialnan cu ta esencial pa sistemanan electrico y di comunicacion na Venezuela ta wordo extrai, cual ta inclui koper. E sistemanan aki segun e turista ta esencial pa siguridad nacional di e pais no wordo perhudica. Aunke e manera con esakinan ta drenta na nos pais ta licito, e manera con nan ta sali di Venezuela ta ilicito. “Mi ta kere tur negoshi tin cu comproba cu tur cos cu nan importa ta wordo haci di manera legal. Pasobra no ta asina cu bo por trece cualkier cos un pais sin mustra di unda e ta bin y si e manera cu el a wordo obteni na e pais di origen ta legal.”

E turista mes ta bishita Aruba frecuentemente y a expresa na e matutino aki cu e ta considera Aruba manera su ‘di dos cas’. P’esey mes e turista ta reconoce e relacionnan estrecho cu ta existi no solamente riba base cultural pero tambe base comercial y turistico entre Venezuela y e islanan. Sinembargo Venezuela tin di cuida su interesnan ora ta necesario, cual actualmente segun e turista ta na un punto critico. Sinembargo e ta haya cu ta importante pa no solamente reconoce e fayo di autoridadnan Arubano encuanto Venezuela si no pa reconoce tambe cu internamente Venezuela no semper ta percura pa e siguridad di cosnan cu ta sali e pais bay di manera corecto.

“Mi no ta kere ta djis culpa e islanan pa malo, si no cu tin simplemente un problema y lo esaki tin di wordo soluciona bilateralmente pa beneficio di ambos partido.” E turista a expresa ademas cu e ta haya cu tin un organisacion criminal similar na mafia tras di e contrabanda aki.

Migracion ilegal
Na mes momento e turista a conta nos cu pa hopi aña nan ta tumando nota cu e migracion ilegal na paisnan den Caribe di parti di Venezolanonan ta birando mas y mas. E ta haya cu parti di e combersacionnan tambe lo ta tratando e manera con por percura pa personanan cu ta drenta nos pais di manera legal no wordo persigui inhustamente. “Mi ta kere desde dos aña pasa ya caba tin un tipo di discriminacion pa Venezolanonan cu drenta Aruba y e demas islanan. Pues mi ta spera cu esaki tambe wordo trata di manera debido.”

Esaki tambe ta relaciona cu e manera con economia di Aruba a sa di beneficia hopi di e turismo di Venezolanonan den pasado.

Aspecto humanitario
E turista tambe a toca tema di aspecto humanitario cu lo ta bon pa trata den e reunionnan aki. Su persona a splica cu el a tuma nota di e manera con prome minister Evelyn Wever-Croes a expresa di kier palabra cu Hulanda pa asina crea un tipo di sistema di registracion pa refugiadonan Venezolano, cual eventualmente cu ayudo di Hulanda lo por wordo traspasa pa Bonaire por ehempel, unda segun e mandatario tin mas espacio.

Sinembargo secretario di estado di Hulanda Raymond Knops ya caba a desmenti cu esaki lo por tuma luga di e manera cu sra. Wever-Croes a pensa. Sr. Knops a declara par di dia pasa na nos partner den noticia Ret Karibense cu e ‘no ta haya e ta un bon idea pa schuif e problema di un luga pa otro’. E mandatario Hulandes a subraya cu e problema ta uno cu a sorprende ‘nos tur’ y cu pa soluciona esaki lo mester pensa riba solucionnan duradero.

E turista Venezolano a duna di su banda cu e ta haya cu autoridadnan local lo tin cu inventarisa cuanto persona a drenta nos costanan ilegalmente of a extende nan estadia mas leu cu e limite legal. Tur esaki lo por conduci pa e personanan aki haya un estadia legal  di refugiado a base di aspecto humanitario. E turista Venezolano a clausura su discurso por medio di subraya cu tanto e pueblo di e islanan como Venezolanonan nan punto di bista lo mester wordo considera den e asunto aki.