Aruba como un pais cu no ta auto sostenibel riba produccion di alimento mester importa esaki for di diferente pais. Pero instancia concerni manera departamento di Higiena y Inspeccion di Alimento mester di mas instrumento moderno pa realisa un debido control riba siguridad y calidad di e productonan alimenticio cu nos comunidad ta consumi.
Esaki directora di e departamento menciona Yvette Geerman a declara na Bon Dia Aruba cu ora ta trata di regulacionnan pa salvaguardia e parti di consumidonan, nos leynan ta uno anticua. Sinembargo esaki no ta kita cu nan como departamento encarga cu e trabou di control y inspeccion di alimento no por implementa maneho. Ta asina cu actualmente a base di nan maneho, nan por bin cu factornan cu ta determina e calidad di alimento cu mester yega cerca nos comunidad.
Sinembargo e ta haya cu no ta solamente leynan of regulacion ta suficiente pa implementa maneho, ya cu tin otro factornan cu ta hunga un rol. Un factor ta e forma con bo por controla e calidad di alimento.
Instrumentonan
Sra. Geerman ta haya cu un factor tin di haber cu e necesidad di mas instrumentonan, entre nan e parti di uzo di tecnologia cu ainda pais Aruba no ta asina leu pa tin tur e recursonan cu modernismo di awendia ta ofrece riba e tereno di control riba calidad di alimento.
Aunke e ta reconoce cu tampoco ta posibel pa nos pais cu ta uno chikito mester tin tur tecnologia. E situacion aki ta demanda cu nos instancianan cu ta carga e responsabilidad aki, mester traha mas estrecho cu otro paisnan cu por brinda nos e asistencia necesario riba e parti di control pa garantisa e calidad di alimento importa.
“Un factor cu ta hunga un rol hopi importante ta entre otro, e parti di tecnologia cu nos no ta riba e nivel cu nos mester ta ainda.”
E uzo di tecnologia lo facilita entre otro cu laboratorio por realisa su trabou a base di esey. E ta remarca cu tin algun puntonan cu ainda tin ‘mancamento’ den dje, y un di nan ta cu nos leynan no ta up date of optimal. Pero un biaha mas, e ta aclaria cu nan departamento como un instancia di salud y control di higiena y inspeccion di alimento por implementa maneho sin problema.
Trabou di control
Sra. Geerman a bisa cu nan departamento mester zorg riba higiena di alimento. Tambe nan ta esun cu mester tuma muestra conhuntamente cu laboratorio pa nan por analisa e calidad di alimento of cuminda. Pero tambe ta e parti di Departamento di Veterinario cu tin su trabou specifico di controla e parti di calidad di carni.
El a splica cu tin diferente atencion cu nan ta pone na momento cu nan ta realisa control riba e calidad di alimento pa ehempel, kico nan ta contene; ki sorto di bacteria e por tin y su risiconan pa e consumido.
Pero esaki ta regarda cu nan mester tin ekiponan pa realisa tur e detayenan di nan trabou di inspeccion y control riba tur loke ta wordo consumi, ya sea cuminda y bebida. Tur esaki ta inclui cuminda cu ta cla pa come, como tambe cuminda procesa, ya cu nan trabou ta hopi amplio riba tereno di alimento, el a laga sa.
P’esey ta importante segun sra. Geerman cu ora cu productonan ta drenta nos pais nan departamento por tin un control ariba nan. Aunke e ta dificil pa nan por tin e completamente bou control.
Un punto masha importante di nan control tin di haber cu e fecha di vencemento di e productonan, ya cu e ta garantisa un calidad di cuminda. Otro aspecto tin di haber for di cual pais e productonan ta bini. “Eynan bo tin un informacion mas of menos con e proceso por ta den e pais for di unda e producto alimenticio ta wordo elabora”, e ta bisa.
E ta declara cu ora cu e productonan ta na benta cerca e consumidonan, Departamento di Higiena y inspeccion di alimento ta actua tur momento, ya sea di forma preventivo cu ta controlnan di rutina pa evita cu cosnan no bay den un forma cu mester ta corecto. Tambe nan ta a actua si tin denuncia haci di caso relaciona cu intoxicacion di cuminda. Den caso aki nan ta realisa un investigacion pa averigua prome con e situacion a tuma luga, con e cuminda a wordo procesa y warda di e manera cu e no ta optimal mas pa e consumo humano.
