Falta personal di migracion na aeropuerto

Sindicato TOPA (Trahadornan Organisa di sector publico di Aruba) a duna un splicacion tocante e situacion na migracion di aeropuerto, cu ta keda un problema mirando e falta di personal y temporada pisa.

Presidente di sindicato, Rene Bernabela a duna di conoce cu na e momento aki, migracion ta den e prome fase di locual ta plan di formacion pa reorganisa e departamento y tambe ta atende riba e asunto di promocion.

Pa e otro, parti ta e situacion cu trahado ta trahando ‘severamente cu tiki personal’ segun Bernanbela. E trahadonan ta haciendo nan maximo esfuerso pa satisface y duna ‘bon bini na tur turista cu yega Aruba’.

E ta comparti cu den ultimo aña, migracion ta conociendo un ‘vergrijzing’. Segun Bernabela durante e proceso di vergrijzing, gobiernonan cu a sinta no a zorg pa encamina e procedura pa ‘recluta personal nobo’.

“Migracion di aeropuerto no a conoce un reclutamento pa e ultimo 10 aña, pa un personal nobo. Sin papia tocante e material nobo cu tampoco a conoce. Consecuencia ta cu na momento cu tin tiki personal, cu ta haciendo nan esfuerso pa traha, pero ta yega momento cu nan ta cansa. Esaki ta e parti cu nan ziektemelding (bay ao) ta cuminsa manifesta su mes”, el a splica.

Segun Bernabela, a sinta varios biaha cu minister encarga cu departamento di migracion. A trece e problema na su atencion, pero di parti gobierno tin problema na nivel nacional pa e parti di Caft y rijksministerraad, cu ambos kier pa baha gasto di personal.

Sinembargo e ta bisa cu sindicato TOPA no ta compronde e problema. “Con por ta posibel cu Caft ta bisa gobierno tin cu baha gasto di personal, pero otro banda sindicato ta tuma nota cu falta personal.”

Bernabela ta bisa cu eynan tin dos problema ta pasando y cu no tin splicacion amplio cu haci pa yega na solucion. Tampoco por bisa con lo yena e necesidad di departamento di migracion.

Pa pone un persona den e trabou di migracion, e ta comparti cu e trabou ta specialisa, cu mester prepara e persona prome nan drenta den ‘cualkier booth pa haci e trabou di migracion’ y no ken cu ta, pasobra no ta posibel. E ta expresa cu ta un trabou serio, cu responsabilidad ta tuma luga y tin consecuencia si den caso algo bay robes.

Actualmente, un trahado den e departamento ta trahando 12 ora pa dia. “E orario supuestamente ta 8 ora. Ta abnormal cu e trahado di migracion tin cu traha di 7am pa 7pm of 11am pa 11pm.”

Un persona cu a cumpli su 8 ora di trabou, pa despues e tin cu traha ‘over- time’, pero e ta bisa cu si gobierno pa 2020 ta bay corta e overtime… kico ta bay pasa? Segun Bernabela e situacion cu ta pasando den departamento di aeropuerto ta serio.

Sindicato TOPA kier sa di parti di gobierno kico nan ta bay haci cu e problema,mirando cu e problema no ta haya solucion y ‘mester tene cuenta cu ta papiando di entrada di unico pilar economico cu Aruba tin, cu ta turismo’.

Sinembargo e ta bisa cu no solamente tin situacion cu ta pega na migracion di aeropuerto, pero tambe ‘a manifesta na departamento di meteorologia’, cu segun Bernanbela ta den e mesun secuencia.

Pa e motibo aki, e ta enfatisa cu e pregunta ta bay na e minister concerni con ta bay haci cu e problematica, pa motibo cu e ta bisa cu aeropuerto por downgrade y linea aereo por cambia pa otro destinacion y no Aruba.

E ta bisa cu tambe ta compronde cu e parti financiero. “Unda ta bay saca fondo pa busca personal? Nos tabatin comprension cu gobierno, pero nos a bisa nan cu tin cu tene cuenta cu problema di vergrijzing cu ta tumando luga.”

Bernabela ta expresa cu no ta asina ta laga tur hende bay cas cu pensioen y no ta tuma hende nobo den servicio. Esaki por crea un crisis den e departamento di gobierno, ‘unda por crea un shutdown den departamento y esey no ta yuda economia di e pais’.

Pa finalisa, el a splica cu mirando cu e aeropuerto ta e parti vital importante pa locual ta trata turismo, cu ta e pilar economico, tin cu tene na cuenta cu minister di Husticia y esun encarga cu Turismo, pa un solucion na e departamento y tambe esun di meteo, unda tambe tin nan problema.