Awe Debate Democracia Aruba 2017

Ayera cu ausencia di representantenan di tres partido: AVP, RAIZ y CURPA, e otro partidonan: MEP, MAS, POR, UPP, RED y PPA sa participa pa trek e numbernan pa e Debate Aruba 2017 organisa pa Radio Latina y Fundacion Dominicana Arubanse Juan Pablo. E debate aki ta tuma luga awe pa 6’or atardi na Cas di Cultura.

Nan a warda te ultimo momento pa asina despues di e acto di sosten di firmanan exigi pa nos ley electoral, nan por a haya sa cual ta e partidonan cu definitivamente lo participa den eleccion general di otro luna. E secuencia di e partido riba stage ta keda asina: 1.MAS, 2. RAIZ, 3. POR, 4. PPA, 5. AVP, 6. RED, 7. MEP, 8. UPP y 9. CURPA

Ayera tardi a pesar di e ausencia di e tres partidonan, Win Donata di Radio Latina a sigura cu tur partido cu lo participa den eleccion venidero te ainda a sigura cu nan ta participa den e debate di awe cu a wordo organisa pa e comunidad Latino na Aruba. El a trece dilanti cu e comunidad Latino mester di mas informacion ariba diferente partido politico cu ta existi na Aruba y cu nan lo participa den eleccion di dia 22 di september proximo.

El a splica cu a pesar di UPP y PPA a cera cabes pa traha un solo lista den e debate nan ta participa separa ariba nan mes. Sr. Donata a laga sa cu huridicamente por carga mas cu un partido ariba lista. Pero nan ta keda un partido dividi. “Lista ta un cos y partidonan ta otro cos.”

Tambe sr. Donata hunto cu e presidente di e fundacion Juan Pablo Duarte, Winston Tavarez y e moderador di e debate Wilmer Aristizabal a trece e ultimo detayenan di e debate aki cu nan ta bin organisado durante e delaster dos luna. Nan a bisa cu e debate aki lo ta diferente na e otronan debatenan cu a tuma luga den cuadro di eleccion venidero. E ta dos parti of seccion: E prome ta na base di pregunta y contesta. E di dos seccion nan ta bay debati cu otro ariba un pregunta den general. E moderado ta e persona cu a prepara e preguntanan y e tema di e preguntanan a wordo entrega na tur partido. E preguntanan lo ta specificamente pa aclaria e falta di informacion politico cu ta existi cerca e comunidad Latino na Aruba.

Nan a formula un invitacion na tur persona interesa pa presencia e representantenan di 9 partido. E invitacion aki ta bay muy specialmente pa e Latinonan residencia na Aruba y cu derecho di voto. Tur fondo cu lo wordo colecta cu e benta di ticketnan ta bay pa e fundacion Juan Pablo Duarte.

Sr. Tavarez a premira cu e evento aki cu ta fortalece democracia lo ta un actividad sumamente exitoso pa e comunidad Latino por obtene mas informacion pa e dia di eleccion nan por vota conscientemente.