Falta hopi pa aclara pa locual ta huurmento di apartamento na Aruba

Actualmente tin hopi hende cu ta trahando apartamento pa huur riba tereno di nan cas pa ofrece esaki  na turista y hende local. Bon Dia a bay haci un investigacion mirando cu tin hopi contradiccion tras di esaki den e sentido cu tin hende ta pensa cu esaki ta algo cu ta beneficia e economia di Aruba, y otronan ta bisa cu esaki ta afectando nos sectornan di hotel. Na un conferencia di ATECH aña pasa, un experto den panel a comenta cu Aruba mester tene cuenta cu desaroyo manera Airbnb (Sharing Economy) pa motibo cu esaki por afecta cierto industria manera hotel. Bon Dia a haci un investigacion den esaki y a topa cu varios contradiccion.

Bon Dia a papia cu meneer Oscar Cardona kende a recientemente habri su mesun negoshi pa huur apartamento na tereno di su cas den cercania di Playa Pabao. E ta conta cu e tin 2 apartamento cu e ta huur pa turista y otro e ta huur pa local. Pa bo habri un luga grandi ta exigi hopi mas rekisito segun Sr. Cordona manera entrega di diferente permiso y tambe e ta bira un proceso hopi mas largo.

” 3 of 4 biaha pa siman, mi ta haya normalmente 2 of 3 persona of un pareha cu kier bin keda cerca mi y esaki mi por haci sin problema” , Sr. Cardona ta conta Bon Dia.

Sr. Cardona ta sigui splica cu tin hopi cas cu a wordo adecua, caminda cu tin diferente camber ta wordo traha den nan of construccion di un pida extra pafo unda nan ta hinca mas hende. Esaki segun Sr. Cardona e no ta haya cu ta algo bon pa motibo cu mayoria di e luganan aki no tin permiso, no a registra na Camara di Comercio (KVK) y no ta un negoshi legitimo.  

 ”Mi tin 4 luna cu mi ta haciendo mi negoshi den e manera aki y mi no ta sinti e necesidad di haci’e mas grandi tampoco” Sr. Cardona ta bisa.
Sr. Pedro, Gerente di ‘Sasaki Apartments’  na Noord, ta conta Bon Dia cu nan ta actualmente  purbando di haci poco diversificacion pa atrae diferente tipo di turista. E ta splica cu den e 15 aña cu nan tin den servicio nan nunca a haya nan mes cu problema manera ta pasando e ultimo 2 pa 3 aña. Actualmente nan ta haya turista ta bin cerca nan y nan kier camber mas barata. Nan no por baha nan prijs di huur y esaki ta causa cu hopi turista cu mayoria awor ta di nacionalidad Venezolano, ta dicidi di bay keda otro caminda cu ta mas barata pa motibo cu nan no tin suficiente fondo pa keda den un hotel of apartamento mas grandi of mas caro.

No por maltrata turismo di Aruba si ta biba for di dje

Segun estadistica di Central Bureau of Statistics Aruba (CBS) , na 2014  Aruba a haya 250,000 turista for di Venezuela, 576,000 a bin for di America y hunto cu Canada nan ta yega na 630,000.  Ta conclui cu a haya mas turista ta bini Aruba for di America y Sur America den comparacion cu Europa por ehempel cu solamente tabata tin 113,000 turista cu a bini for di eynan den aña 2014/2015.

Aruba a traha mas cu 50 aña riba su turismo pa a yega caminda cu e ta aworaki. Segun un meneer cu a dicidi di keda anonimo y cu tambe ta doño di un negoshi di apartamento, no por maltrata industria di turismo si nos ta depende riba esaki.
E ta splica cu si e haya un turista, e tin cu cera su boca y haci’e miho pa por yuda. Si un turista bin na su negoshi anto e no ta gusta, e ta sinta cun’e y ta yuda su persona busca un otro luga sin cobra p’esey un cen. Ta e turista mes ta dicidi kico nan kier y na unda nan kier keda, sea ta un turista Mericano of Latino, no tin motibo pa discrimina pasobra turista ta keda turista.

 Segun e meneer aki e ta haya dolor cu Venezuela a nifica hopi pa Aruba temponan aya ora cu cos tabata miho, y awo cu Venezuela ta den malo, ta trata nan manera cu nan ta cacho. Den temporada halto, Aruba ta haya entre 14 cu 18 vuelo pa dia cu ta bin for di Venezuela so , y esaki ta hopi mas den comparacion cu Curaçao cu ta haya menos cu 10 vuelo pa dia cu ta bin for di Venezuela.

Despues di 30 aña di Status Aparte, Aruba su turismo a crece di mas cu 200,000 te cu 1 miyon pa aña na 2014. Den e mesun periodo aki, si mester haci comparacion, Curaçao a crece for di 250,000 pa un 350,000 pa aña.  E motibo pakico cu Aruba su crecemento ta hopi mas grandi segun e meneer aki ta pasobra nos tin un diferente actitud pa ora ta trata cu turismo y e turistanan mes den general. Esaki segun e ta sigui splica ta locual a hiba Aruba pa dilanti pasobra aki na Aruba ta sirbi tur hende mescos y no ta importa for di cua parti di mundo nan ta bini of den ki nivel nan ta. Esaki sin tin mester di discrimina ta e motibo dicon Aruba mester tene hopi na cuenta pa no contradeci su mes pa locual ta turismo.  Segun e meneer ta conta Bon Dia, con por ta cu ta haci curso pa trata y papia bon cu turista, y despues ta haya indicacion pa ataca turista di e forma cu ta wordo haci cu Venezuela cu tur e papiamento malo cu ta andando.

Janique Schilders, manager na Quality Apartments den Schotlandstraat, ta conta Bon Dia cu nan no ta wordo afecta mes di esaki. E negoshi di Airbnb, cual ta un pagina di web cu bo por uza pa huur apartamento na bo cas of camber pa uza manera oficina, segun Schilders no ta afectando nan negoshi mes pa motibo cu nan tin diferente cliente cu ta keda cerca nan.

E cliente cu ta bin keda cerca nan ta exigi tur locual nan tin y nan por paga esaki tambe. Quality Apartments ta traha den un manera mas profesional segun Schilders y nan no mester preocupa cu esaki pa motibo cu nan ta haya cliente cu ta bin keda cerca nan pa mas tanto motibo di negoshi y nan ta riba un nivel mas halto, den e sentido cu nan tin hopi cliente cu ta cu nan pa basta aña caba tambe.

Bon Dia ta sperando di haya mas informacion for di ATA y AHATA pa locual ta e topico aki y si en berdad ta afectando e sector di hotelnan mas grandi.