Tin hopi trabou pa haci na Aruba en cuanto ta e diferente aspectonan di abuso domestico. Sinembargo Fundacion pa Hende Muhe den Dificultad (FHMD) ta mira si cu poco poco e taboo cu tin rond di e tema aki ta kitando. Nan si a realisa cu gran parti di e comunidad ainda tin falta di educacion riba abuso domestico.

Coordinador di e fundacion Magaly Maduro ta bisa Bon Dia Aruba: “Den e periodo di carnaval cu a pasa nos a ripara cu tabata tin test pa nos, gratis haci na Aruba. Pasobra nos a ripara door di e comentarionan cu tabata tin den e periodo ey riba con un parti di nos comunidad ta para contra e problema aki. Locual nos por a conclui ta cu tin hopi cosnan cu no ta conoci na Aruba.”

Husgamento di victima
Pero e fundacion a ripara tambe cu un gran parti di e comunidad no sa suficiente di e topico aki. Hendenan ta husga e victima den un manera cu e fundacion mes a keda basta sorprendi.  “Diferente comentarionan manera: ta e muhe mes ta busca, e mes tabata kier. Of : ora cu un muhe tin diferente homber e merece wordo bati.  Nan tabata expresionnan hopi pisa cu nos a tende via diferente medionan di comunicacion. Esey pa nos tabata cla y raspa cu e mensahe di e pueblo tabata ta: nos mester wordo educa.” sra. Maduro ta splica.  E no tabata algo necesariamente nobo pa e fundacion pero papiando pa su mes, sra. Maduro ta pensa e ta trata di un grupito di hende ta pensa asina y no gran parti di e comunidad. “Nos ta na aña 2017, kiermen mi a kere cu nos tabata mas na altura di e topico pero e diferente reaccionnan cu nos a mira  ta mustra cu esaki no ta e caso.”

Congreso dia internacional di muhe
E aña aki e fundacion no a dicidi di bay ‘all out’ pa locual ta dia internacional di hende muhe riba 8 di maart. Pa motibo cu e fundacion ta participa na e congreso cu minister di Enseñansa ta organisa tur aña unda ta reconoce derecho di tur hende muhe. Esaki lo tuma luga diaranson 8 di maart na Renaissance Convention Center for di 9’or di mainta pa 3’or di atardi. E fundacion ta forma parti di dje como invitado.  Ta bay tin lecturanan por ehempel di Wendy Maduro Johnson unda cu lo papia riba e topico di e ser femenino. ” E ta semper interesante pa bo bay un conferencia cu ta wordo organisa den e magnitud aki,” sra. Maduro ta bisa.

Cooperacion cu media
Pa e aña aki e fundacion ta bay naturalmente sigui traha pa brinda e ayudo na hendenan cu en berdad mester cu ta pasando den situacion dificil. Segun trahado social na e fundacion,  Maria Carrasquilla:
“Mirando con nos ta bezig aworaki nan ta trece e informacion mas cerca di nos comunidad gradiciendo tur miembronan di prensa, e ta yudando e mensahe yega tambe cerca hende homber cu ta pasando den situacionnan fastioso.” E aña aki e fundacion tin un cooperacion cu TeleAruba unda cu dia 6 di maart nan lo presenta na e programa di Xiomara “Nos Mainta”.

Teenage Dating Violence
Segun sra. Maduro: “Akinan nos ta bay toca e tema di ta orguyoso di ser hende muhe aki na Aruba. Nos tin un lista di invitado cu lo ta eynan presente y den combersacionnan cu nan nos lo bay toca e topico di dia internacional di hende muhe.” E fundacion ta trahando duro riba un proyecto yama Teenage Dating Violence. Fin di april nan lo tin un presentacion interno mes over di con e proyecto ey a bay te na momentonan aki.”

Cooperacion Task Force traficacion
Manera cu nos matutino a informa anteriormente, e fundacion ta bay intensifica e cooperacion cu Task Force di traficacion humano tambe e aña aki. “Lamentablemente na Aruba esaki tambe ta existi y ta algo cu nos tin cu traha riba dje. Riba esey nos tin palabracionnan cu gobierno mes caba como tambe e grupo di Task Force pa opvang di e personanan aki”, asina sra. Maduro ta splica. Aworaki e cas unda cu ta opvang e victimanan ta practicamente yen. “E gana pa sigui yuda t’ey cual ta parti di nos trabou. E idea ta keda mesun cos, e parti di trabou pa e shelter, peticionnan di opvang cu ta drenta seguramente nos lo atende nan. Tin hopi plan pa futuro cu seguramente nos ta bay traha poco poco na dje pa realisa.”