Recientemente a tuma lugar un reunion cu algun stakeholder ambiental relaciona cu avance di e proyecto di criadero di pisca riba lama di Petros Aquaculture Operations VBA. Sinembargo, a laga algun stakeholder fuera di e reunion, y esunnan cu si tabata aden, no a haya tur informacion disponible.

Na juli di 2023, Bon Dia Aruba a reporta cu un compania local, Petros Aquaculture Operations VBA tabatin intencion pa bin cu un proyecto pa cria pisca riba lama di Aruba. E tempo aya tabatin algun confusion riba si e compania a pidi un permiso y ontheffing pa e proyecto. Na augustus, Bon Dia Aruba a tene un entrevista cu Gunnar Bracelly, kende a relata e idea tras di e proyecto y tambe a papia tocante con tecnologia moderno den cria di pisca por minimisa su impacto ambiental. Por lesa tur informacion riba esaki riba nos website, https://www.bondia.com/?s=petros+aquaculture of scan e QR code adhunto.

Awo, e proyecto ta avansando. Minister demisionario di Naturalesa, Ursell Arends, riba su pagina di Facebook a indica cu recientemente, Comision MER (rapport riba efecto riba medio ambiente) “a presenta resultadonan preliminario ariba e efectonan di e proyecto di aquacultura di Petros pa loke ta nos medio ambiente.” E minister a agrega cu “dentro di aproximadamente 6 siman e rapport cu nan conseho lo wordo publica y lo tin posibel espacio pa consulta participativo cu stakeholders.” Ya caba e comision a reuni cu algun stakeholder, manera organisacionnan ambientalista, riba dia 28 di februari 2024 y tambe dia 21 di januari ultimo.

Sinembargo, NGO Rainbow Warriors Core Foundation y Caribbean Applied Engineering and Science Research Foundation no tabata presente na e reunion aña pasa pa motibo di malesa y biahe, pero a pidi pa tene nan al tanto di e desaroyonan. Sinembargo, esaki no tabata e caso, y no a invita e fundacionnan aki dia 21 di januari tampoco. Den un e-mail na Departamento di Asunto Economico, presidente di e fundacion, Milton Ponson a condena e hecho cu no a invita e fundacion na e reunion cu comision MER dia 21 di januari, mencionando cu tampoco a invita Applied Engineering and Science Research Foundation, FANAPA y Fundacion Accion Ambiental.

Pero mas preocupante ta e hecho cu e e-mail aki ta menciona cu organisacionnan ambientalista a duna conseho negativo pa e proyecto, y cu autoridadnan ta ignorando esaki. “Tin tres rapport negativo for di DLVV, DNM, Directie Scheepvaart y tres for di ACF [red: Aruba Conservation Foundation], Turtugaruba y Aruba Marine Mammal Foundation. Asina mes, gobierno di Aruba aparentemente ta buscando un manera pa acomoda e desaroyadornan di e proyecto,” Ponson ta expresa.

Entre otro, ta menciona cu tin falta di legislacion pa cu proteccion di tera y lama na Aruba, y no tin un ley di maneho di asunto maritimo riba cual por basa un conseho pa e proyecto. Tambe tin diferente preocupacion riba e impacto di tin concentracion di pisca asina den lama. Por ehemplo, si e pisca bira malo, e patogeno por afecta pisca salvahe. Tambe si pisca huy for di nan haula y reproduci cu pisca salvahe, esaki por pone presion riba e variedad genetico di pisca den Caribe, algo cu ya ta bao presion. Den su entrevista cu Bon Dia Aruba, Bracelly a papia riba algun di e temanan aki. Por lesa mas door di scan e QR adhunto.

Pa e motibo aki, Ponson a bisa cu a haya su mes “forsa di bay publico y haci un yamado riba expertonan global pa corobora, sostene y suplementa e argumentonan contra e proyecto aki, menciona den e seis rapport.”

En conclusion, Ponson ta bisa cu tur esaki ta mustra cu tin un falta di transparencia den e proceso di evaluacion di e proyecto y den otorga e permisonan necesario.

Mientras tanto, ministerio di Asunto Economico (DEACI) no a comenta riba e desaroyonan aki.

Potret di Innovasea y Minister Ursell Arends.