Tin dia cu bo ta casi cansa di e manera di opera, no solamente di gobernacion, pero di tur loke ta alrededor di esaki. En general nos no ta mira un cambio den esaki, mientras ta spera di nos, como prensa, y di nos lectornan, pa nos kere den tal o cual version di e asunto, pero no ta duna nos e informacion pa esey. Den e edicion aki un recado di prensa di Fundacion Lotto pa Deporte, unda ta relata kico tabata e maneho financiero di ultimo añanan. Asina ta splica tambe cu na 2020 e fundacion a logra haya menos placa, producto di e situacion di crisis di pandemia aña pasa. Loke e recado di prensa NO ta bisa ta si esey ta conduci na menos placa disponible pa deporte pa via di menos entrada, pero si ta bira bisa cu lo tin menos placa disponible pasobra gobierno, a traves di e ministro responsable, no a bay di acuerdo pa prolonga e moratorio di pago na gobierno di e 17 miyon florin cu gobierno a inverti den e stadionnan construi. Esey aparentemente tabata e acuerdo, segun e fundacion. E moratorio tabata pa 10 aña, periodo cu lo a vence na juli aña pasa. Y awor no mas bo ta bisa nos? Awor den campaña? En todo caso, e fundacion lo mester a paga gobierno 1,5 miyon florin, loke ta laga solamente 2,5 miyon florin pa inverti den deporte.

Cuanto tin disponible pa e federacionnan riba e entradanan di 2020 no ta conoci, pasobra no tin cuenta anual cla ainda di e aña ey, pero porfin a entrega si e cuentanan anual di e añanan anterior cu a keda pendiente. Masha bunita, bo por bisa, nan ta casi ‘bij’ cu nan administracion, aplauso. Pero, un momento, unda e ciudadano, o prensa, por haya e cuentanan ey pa mira? Atrobe nos mester kere ciegamente den palabra di esnan envolvi cu nan a haci nan trabao corectamente? No ta aki atrobe, y ainda, henter e maneho di gobierno y di e tipo di fundacion aki por papia kico nan kier, pero nos no por controla NADA. Kico ta e resultado anto? Cu hende ta bay huzga e asunto como uno politico. Esun cu ta berde ta kere directiva di e fundacion, y e contrincantenan cu a mira henter e proceso di conflicto cu e actual ministro y ta di su color politico, lo apoya e mandatario. Y esnan cu ta di otro orientacion politico, o ta haya cu nan opinion politico no tin nada que ver den e asunto aki, kico nan mester pensa? Cu den henter e asunto aki, atrobe, nos no ta haya di tende tur e detayenan. Y di e manera aki esaki no ta nada mas cu un continuacion di e conflicto cu ta durando casi cuatro aña caba, desde cu e actual gabinete demisionario a drenta gobernacion.

Nos por corda cu e tempo aya, e ministro tabata desea pa e directiva di e fundacion renuncia pa e nombra un otro directiva, di su hendenan di confianza, pero huez a pone un paro na e pretension ey. Esey no ta kita cu, e tempo aya y awe, ministro y e fundacion ta responsable pa un relacion di trabao, cu no mester ta di amor genuino, pero si ta garantiza cu por comunica manera hende grandi, pa bon di bienestar general. Den esey ta normal cu e mandatario di turno ta duna di conoce kico ta su maneho pa desaroyo en general di deporte y unda e ta desea pa e fundacion tene esey na consideracion. Loke nos por comprende di e recado di prensa di e fundacion, cu te awe ainda e ministro concerni no a duna nan su maneho pa e periodo di gobernacion. Nos no sa si esey ta berdad, ta na e mandatario pa desmenti o admiti esey, pero ta e cosnan aki ta crea problema innecesario. E mandatario, cualkier mandatario, no por dicta e fundacion kico pa haci, pero e fundacion no por ignora totalmente e deseonan relaciona cu maneho pa e sector tampoco. Esaki ta cosnan cu e Editorial aki a trece dilanti durante e caso cu e ministro a perde na corte, ora a resulta cu e tradicional ‘takeover’ di directiva di e fundacion no a resulta posible. Ta di lamenta cu despues di tanto aña, y cu un staff considerable rond di su persona, ainda no a cende un luz cu mester a confronta e fundacion cu un maneho pa deporte? Pesey bo tin hende bon paga, esey nos ta supone en todo caso, pa percura cu bo maneho ta explicitamente documenta. Y si acaso ta existi un maneho riba papel, o riba computer sikiera, lo no ta bon pa comunica esey cu prensa y publico? Nos tambe ta interesa pa sa kico e plannan ta(bata).

Pero pa bolbe na e fundacion: pakico tanto secrecia tocante cuenta anual? Ta facil pa bisa cualkier cos di cuanto placa a gana of no, nos mester kere boso riba boso palabra pasobra no tin transparencia, den sentido di publicacion di boso cifranan. Ta bira tempo pa henter gobernacion, y tur cos rond di esaki, cuminza tuma nan papel di informa pueblo na serio, no solamente un comunicado di prensa hustamente den tempo di campaña, pa desacredita e ministro? Ki dia e practicanan aki ta caba?