Manera ta conoci, taxistanan tin un tarifa cu a keda estableci pa gobierno pa asina por sigura cu tin “competencia husto” y evita cu un taxista ta cobra mas cu otro, pero esaki no semper ta e caos. Den fin di siman un turista a publica ariba rednan social cu el a encontra un situacion na unda un taxista kier a cobr’e mas di loke ta estableci pa un distancia specifico, un situacion cu en realidad ta basta comun.
Den su publicacion e turista ta splica cu nan a subi un taxi pa hiba nan for di nan hotel, Tamarijn AI, pa aeropuerto, cual ta menos cu 15 minuut di distancia. E ta sigui splica cu un hoben femenino a hiba nan y a bisa e pasaheronan cu pasobra cu e tarifanan nobo no ta na vigor ainda e por cobra loke e kier, na cual e turista a indica cu e ta na altura di e tarifanan di 2022 cu gobierno a implementa cu taxistanan mester sigui.
“Mi a bis’e cu nos no ta estupido y cu nan mes mester sigui e tarifanan di 2022. El a purba cobra mi 35 dollar. E mucha muhe na Tamarijn a bisa mi cu e tarifa mester ta 26 dollar… cual ta corecto? Mi a sinti cu e tabata purba estafa nos. Mi a dun’e 30 dollar. Asina mi a paga 26 dollar plus 4 dollar di tip pasobra mi tabatin solamente papelnan di dollar mas grandi den mi cartera. E tabata un tiki ‘arogante’ y mi no tabata kier baha na su nivel,” e turista a indica.
E publicacion a ricibi un cantidad di reaccion y comentario di parti di tanto ciudadanonan local como turistanan. E mayoria di usuarionan cu a comenta a confirma cu en berdad e tarifa pa e distancia di e hotel menciona pa aeropuerto ta 26 dollar, cual ta e tarifa cu gobierno a establece na 2022 y cu ta vigente te na momento cu gobierno introduci tarifanan nobo.
Otro varios usuario a indica cu e turista por a saca potret di e number di auto di e taxi y reporta esaki, pasobra taxistanan mester sigui e tarifanan estableci na 2022 y no cobra otro tarifa of aumenta e prijs na manera cu nan ta desea.
Un usuario specifico a splica cu si un taxista ta traha pa un compania, nan mester sigui e tarifanan estableci den 2022 y por cobra un tarifa adicional di tres dollar pa cualkier cos despues di 11or di anochi den siman y henter dia riba diadomingo. Pa loke ta taxistanan independiente, el a indica cu como cu nan ta traha pa nan mes, nan ta pone nan propio orario etc., nan por cobra loke nan kier.
Otro usuario a clarifica cu tur taxista en realidad ta trahadonan independiente ya cu e permiso di taxi ta wordo entrega na un persona individual y no a traves di un compania. Taxistanan cu ta afilia na un compania ta haci esaki pa sigura un fluho di pasahero mas sigur, pero ta keda taxista independiente na final.
E mesun usuario a splica cu e lista di prijs ta un lista di sugerencia pa e minimo, pero no ta un tarifa bou mandato cu e taxistanan mester sigui. El a sigui splica cu considerando e inflacion e ultimo añanan, usa un lista di prijs di dos aña pasa no ta un posibilidad mas.
Otro usuario a comenta cu aunke en berdad tin un tarifa estableci, un problema grandi cu e taxistanan ta enfrenta ta aumento di prijs di gasolin, locual na su turno ta hiba e taxistanan na aumenta loke nan ta cobra pa transporta turistanan.
“Mi ta biba aki. Loke antes tabata costami 40 dollar pa yena mi tanki di gasolin aworaki ta costa mi 50 dollar. E no ta husto cu nan mester paga mas pa gasolin pero mester cobra e tarifa di 2022. Mi ta sinti sorry pa nan. Honestamente ami lo a duna e 5 dollar extra cu e tabata kier. Mi ta casi sigur cu prijs di gasolin a aumenta un bo ta biba tambe,” e usuario a remarca.
Na november di aña pasa minister di Transporte, Ursell Arends, a anuncia cu prome cu fin di aña ta bay publica un maneho nobo pa transporte publico cu tambe ta bay atende cu e lista di prijs pa taxi.
Taxi tin un tarifa estableci pa tur di nan cumpli cune y asina tin e “competencia husto,” unda un no ta cobra mas cu otro, pero manera ta birando mas conoci, taxistanan no ta cumpliendo cu e lista di prijs aki pa motibo cu segun a informa, e no ta vast den e ley.
Minister Arends a referi na e lista di prijs estableci na 2018 te cu 2022 y a remarca cu pa loke ta trata maneho nobo di transporte publico, nan ta bay atende cu e lista di prijs tambe.
El a menciona tambe cu nan a sinta cu e representantenan di federacion di taxistanan, unda tin diferente central di taxista, y den ultimo reunion e minister a pidi nan pa reorganisa nan mes den un solo organo cu ta representa nan tur, debi cu tin un total di 465 taxista y asina un persona so por representa nan.
Den luna di augustus ultimo, despues di reunion den parlamento durante cual minister Ursell Arenda a a defende su maneho, particularmente riba traspaso di permiso di taxi, un fuente a confirma pa Bon Dia Aruba cu gobierno ta bay aplica e ley di taxi meter den proximo lunanan.
Esaki pa motibo cu no tin control riba e parti di impuesto, y segun a indica, 20 porciento di taxista tin un debe cu a acumula cu SIAD cu a acumula pa yega na 20 miyon florin. Ademas, esaki ta yuda cu e situacion cu tin actualmente relacion na e tarifa di taxi, ya cu taxistanan ta haciendo uso di un lista di prijs cu no ta den ley, un lista di prijs estableci na 2018 te cu 2022.
