Falta di sosten di 2/3 parti di Parlamento a keda pega riba e 2/3 parti den e ley; Instituto di e Defensor di Pueblo no a drenta Constitucion

E Instituto di Ombudsman, Defensor di Pueblo no a haya e sosten necesario pa bira asina un ‘Hoog College van Staat,’ esta bira parti di Constitucion di Aruba. E proposicion di Gobierno no a haya e sosten di 14 Parlamentario, y unicamente a conta cu e 11 di coalicion.

E ley di Ombudsman a pasa na 2020, despues di un proceso largo. Pero pa a dun’e e luga mereci, e instituto lo mester a keda hancra den Constitucion di Aruba. E reunion riba e tema aki a inicia na 2021, pero nunca a keda conclui. E tempo ey, fraccion di MEP, AVP y Parlamentario Independiente Daphne Lejuez a entrega amienda pa e ley. Ayera, MEP a hala su amienda aden, pero esnan di AVP y di Lejuez, a pesar cu e no ta den Parlamento mas a keda vigente.

E reunion a cuminza cu un peticion di fraccion di AVP pa permiti otro ronda di debate mirando cu tin hopi miembro nobo den Parlamento. Pa por a logra esaki, tur 21 miembro di Parlamento mester a bay de acuerdo. E momento ey lider di fraccion di AVP, mr. Mike Eman no tabata presente. Asina mes Presidente di Parlamento mr. Edgard Vrolijk a dicidi pa haci e pregunta toch, y e prome cu mester a contesta tabata Sr. Arturo Vallejo di fraccion di MEP cu a bisa cu no. Pues e posibilidad pa un di tres rond a keda elimina e momento ey.

Sinembargo, tabata durante e diferente motivacionnan cu a discuti e pensamentonan riba e amiendanan. Entre otro tabatin un amienda cu no ta permiti Gobierno kita e rol di Parlamento ora cu kier saca un Minister for di e constelacion.

E proposicion di ley cu a inclui e hancramento di e Defensor di Pueblo den Constitucion tabatin tambe otro provisionnan, entre otro cu ta fortifica Raad van Advies, pa entre otro por duna opinion/conseho riba rijkswetten. E cambionan den Constitucion lo tabatin como meta pa reforsa e Colegionan Halto di Estado.

Pero nada di esaki por sosode ainda, pasobra no a haya e apoyo necesario pa cambia Constitucion.

2/3

E punto cardinal tabata e amienda di Daphne Lejuez, cu ta trece cambio na momento cu kier retira e Ombudsman. Segun e ley, e candidato ta nomina pa institutonan halto di nos pais y lo mester di sosten di 2/3 parti di Parlamento pa keda nombra. Pero si kier retira e Ombudsman, anto despues di conseho di entre otro Raad van Advies, Parlamento lo por pasa na e retiro cu un mayoria simpel.

Y ta e punto aki a bira un estorbo pa tur fraccion di oposicion.

“Awe ta un dia scur pasobra coalicion no a percura cu e Defensor di Pueblo ta protegi di politica.” Esey tabata e opinion di Miguel Mansur di Accion21. Es mas, tur miembro di e fraccionnan di oposicion tabata opina mescos, pasobra segun e argumento, e realidad politico di Aruba ta cu hende critico no ta sigur di un funcion den Gobierno. Sigur no un Defensor di Pueblo cu tin cu bay haci hopi fastioso y atende cu situacionnan cu por yega na Ministernan of nan famia.

Segun Mansur, tanten cu politica di Aruba ta keda domina pa dos partido grandi, mester haci tur esfuerso pa crea e proteccionnan necesario pa e Ombudsman por haci su trabao sin mester tin miedo cu ta exigi su retiro netamente pasobra e ta haci su trabao.

Marisol Lopez Tromp di MAS a ilustra con director-, ambtenaarnan cu ta vocifera nan critica ta perde trabao of directornan cu no ta de acuerdo cu Gobierno ta haya un ‘golden handshake’ pa bay. Lopez Tromp: “Awe na nivel di director, ambtenaar. Cuanto no ta tribi pa duna nan opinion pasobra nan tin miedo di perde nan trabao. Of hasta esnan cu ta protesta. Punto ta cu ta descurasha hende pa eherce su derecho, corda un Defensor di Pueblo cu mester bay drecha algo robes, ora cu e mester mishi caso di corupcion, haci investigacion delicado y fastioso y por yega na famia. A wak esaki pasa caba.”

Consecuentemente mester tin instrumento pa sigura cu e funcion di Ombudsman ta garantisa, liber di politica.

Tanto fraccion di RAIZ como di MEP no a mira e balor pa acepta e amienda di 2/3 parti di Parlamento pa retira un Ombudsman, ya cu nan ta sinti cu no ta un paso cu ta bay tuma sin mas. Es mas, segun Misha Raymond di RAIZ, no tin precedencia pa esaki. Na Hulanda por ehempel no tin e exigencia di 2/3 parti pa kita un Ombudsman. Marco Berlis di MEP di su banda a bisa cu e ley por funciona manera e ta skirbi. “Tin mecanismo di seguridad y no por kita un Ombudsman con cu ta.”

No tabatin negociacion

Mester bisa cu tabatin varios discusion riba e proceso pa yega na e votacion di ayera. Algun Parlamentario a bisa cu durante hopi aña tabatin sesionnan informativo pa a yega na e Ley di Ombudsman. Esey ta un realidad. Sinembargo aki ta papia di dos tema diferente. Pasobra e ley di Ombudsman a pasa 2020 y locual tabata discuti ta con ta hancr’e den Constitucion. Segun oposicion, mirando cu mayoria miembro ta nobo, nunca a haya e oportunidad real pa discuti e ley cu a trata ayera, ni debati riba e amiendanan presenta na 2021, ora cu a suspende e reunion pa hancra e funcion di Ombudsman den Constitucion.

Segun mr. Gerlien Croes di AVP, no tabatin ningun comision den Parlamento pa debati internamente riba e amiendanan y tur e representantenan di e fraccionnan den oposicion a bisa mescos. Tabatin solamente dos reunion di e Comision Huishoudelijke Aangelegenheden, CHA, cu mester ta secreto. Como tal no por a bay den detaye di e discusionnan, pero tabata den un CHA cu Presidente di Parlamento mr. Edgard Vrolijk a puntra e pensamento pa yama e reunion y tabata kier sa di e Parlamentarionan si nan ta bay sostene e ley. Miembronan di e fraccionnan di oposicion a mustra cu nan no a ni haya e amiendanan como tal no por bisa nada. Despues di a lesa e amiendanan a bin otro CHA y atrobe tabata kier sa di nan si nan ta bay sostene e ley, y aki e contesta tabata, particularmente pa AVP y MAS, cu no por papia na nomber di e otro Parlamentarionan di nan fraccion. E un miembro di fraccion di Accion21, Sr. Mansur en todo caso a bisa e momento ey si cu e amienda unda ta rekeri 2/3 parti di Parlamento pa retira e Ombudsman ta keda un punto di decision. Sin e amienda e lo no a sostene e cambio di Constitucion.

Ryçond Santos do Nascimento a bisa Bon Dia Aruba cu aunke cu AVP tabatin diferente amienda, incluso e Begrotingskamer den Constitucion, e dos amiendanan di mas crucial tabata unda Parlamento ta keda cu e autoridad pa kita un Minister y cu 2/3 parti ta kita un Ombudsman.

Riba e argumento di coalicion cu na Hulanda no tin e exigencia aki, e reaccion tabata cu Hulanda tin matrimonio entre personanan di mesun sexo y net fraccion di MEP no ta acepta esaki. Pues no por compara cu Hulanda.

Marisol Lopez Tromp a bisa cu den pasado Parlamento a yega di permiti tres ronda di debate. Y kizas si RAIZ kier a trece un amienda pa e Kinderombudsman, Defensor di Mucha, manera Sr. Raymond Kamperveen a lamenta cu no a traha riba dje, “e mes por a trece un amienda e momento ey. Pero e ta legislador. Ainda e por bin cu un ley di iniciativa,” Lopez Tromp a mustra. E lider di fraccion di MAS a bisa cu den pasado a negocia hopi cu otro, entre otro riba e ley di screening di Minister, un ley di iniciativa di Edgard Vrolijk mes, cu finalmente a haya apoyo di tur.

Mester bisa cu den oranan di atardi tabatin intercambio riba media rednan social, unda Prome Minister Wever Croes a tambe a ripiti cu tabatin hopi negociacion pa e ley di Ombudsman, aunke cu esey tabata na 2020. Presidente di Parlamento Edgard Vrolijk tambe a uni na e combersacion y a bisa cu el a duna oportunidad pa negociacion. Algo cu tur lider di fraccion den oposicion a nenga categoricamente.

Aunke cu e Ombudsman pues no ta den Constitucion, e ley t’ey, y awor Gobierno mester saca un decreto nacional, un landsbesluit pa institui e Oficina di e Defensor di Pueblo. Segun mr. Vrolijk e ta trahando riba alternativa awor.