Dialuna mainta a habri cu un noticia cu pa hopi ta ser concidera desagradabel, caminda cu radio Power FM a prohibi pa toca y/of menciona e banda popular Le Groove(LG) na nan stacion. E noticia aki a wordo publica pa e motor tras di LG sr. Antoni Gario via su pagina personal di Facebook. Sr. Gario ta menciona un cantidad di persona, entre otro ex-minister Otmar Oduber como esnan responsabel pa e prohibicion aki. Mientras tanto, propetario di e radio sr. Ralph Maduro y director Ruben Garcia a duna declaracion cu esaki no tin nada di haci cu politica y e motibo real ta cu a faltanan respet y nunca Gario a disculpa su mes publicamente.
E declaracion di Gario ta cuminsa na splica cu algun luna atras e lo a sinta cu e ex mandatario, y segun e (Gario) ta e doño di Power FM y hopi otro negoshi tambe. Aunke cu tabata tin tencion ta reina entre e dos personanan aki, a yega na un acuerdo di paz te na final di Carnaval 63. Gario ta sigi splica den su post cu e problema a wordo instiga door di personanan cu ta asocia nan mes cu Oduber. A keda menciona cu entre otro a start un campaña cu yama ‘white is the new pink’, cual ta referi na cu e banda Tsunami lo ta zona awor manera Le Groove, como parti di e boycott contra di Le Groove.
Riba Facebook por a nota un disgusto basta grandi cu mayoria hende tin awor cu e situacion aki y ta di opinion cu ta dañando Aruba su carnaval. Mientras tanto, Bon Dia Aruba a comprende tambe cu posiblemente esaki lo ta Le Groove su ultimo aña participando den e Caiso and Soca Monarch contest.
Nota: Riba e potret por mira skirbi e siguiente declaracion. NO TA PERMITI DI TOKA NINGUN CANCION DI LE GROOVE.
NO TA PAPIA DI LE GROOVE BOU DI NINGUN CIRCUMSTANCIA.
