Siman pasa a tuma luga e conferencia di World Press Freedom (WFPC – Conferencia Mundial di Libertad di Prensa), co-organisa pa gobierno Hulandes. Den esaki, minister di Asunto Exterior di Hulanda, Stef Blok a bisa cu libertad di prensa ‘tin prioridad absoluto pa Hulanda’. Pero ainda no por contesta con libertad di prensa por haya proteccion riba e islanan di Hulanda Caribense.

Segun un articulo di periodista Sharina Henriquez pa e portal online Ret Karibense, durante e conferencia aki a haci cantidad di pregunta di forma digital, pero a confronta problema pa haya contesta.

Periodistanan den Hulanda Caribense for di comienso di pandemia ta sufriendo presion tanto di gobiernonan local como di publico. Manera lectornan por corda, maart ultimo a aresta Henriquez mientras e tabata purba di eherce su funcion durante orarionan di Toque de Queda. “Ainda mi ta ocupa cu e consecuencianan di mi aresto ilegal”, Henriquez ta bisa den e articulo. “Mi kier pa saca mi datonan for di e sistema di polis y n dispensa publico di polis y Ministerio Publico (OM). Pasobra fiscal a pretende cu e fiscal auxiliar no tabata sa cu mi ta periodista. Mientras cu ultimo ey polis atrobe a confirma cu sigur sigur a meld esaki mesora.”

El a agrega cu e kier un disculpa di gobierno tambe, ya cu e ta mira e aresto como un acto mas den un linea largo di actonan contra su persona. “Prome cu esaki caba minister Dangui Oduber publicamente a desacredita mi. Su coordinador Judelca Briceño hasta a bula drenta memey di un entrevista cu mi tabatin cu un empresario y a stroba esaki. Gabinete a usa medio publico pa susha mi nomber.”

Segun Henriquez durante e problemanan cu e tabata enfrentando relacion cu su aresto e no a ricibi sosten di medionan di comunicacion ni di publico en general. “Afortunadamente dos miembro di Tweede Kamer a sali na mi defensa. Pero ya, naturalmente nan no por denuncia e comportamento di e minister aki. Tambe mi tabata contento cu e atencion di Reporters Without Borders (Reportero Sin Frontera). Nan a bisa cu nan tabata den shock cu den Reino Hulandes cu su bon reputacion den e area di libertad di prensa a aresta un periodista.”

El a recorda e hechonan aki pa destaca con ‘e temporada di corona pa mi, bon mira, a aclara bon ki importancia Aruba ta duna na democracia’.

Rednan social
 Un di e topiconan mas importante riba e WPFC ta e papela di plataformanan di rednan social durante e pandemia. E popularidad cresciente di WhatsApp, Facebook, Instagram y Twitter, y otro plataforma digital, ta nifica cu periodista ta haya mas trabao pa trece nan publicacionnan cerca publico, ya cu mester competi cu tur sorto di informacion, incluyendo ‘fake news’, mal informacion, y lucha contra atake digital di grupo di usuario.

Henriquez ta destaca por ehemplo con politico y otro interesado ta usa (y paga) pa e gruponan aki pasobra nan no ta contento cu pregunta critico y investigacion independiente di periodista. E gruponan aki conscientemente ta busca di manipula opinion publico contra prensa, algo cu por nota riba Facebook contra periodista di Aruba y Corsou.

Actualmente, mundo henter ta luchando pa pone protocol- y standardnan cu ta goberna e comportacion di rednan social en relacion cu medionan noticiero.

Maske Hulanda ta cana dilanti pa libertad di prensa, e mesun minister Blok a reconoce cu ‘lastimamente periodista na Hulanda tambe ta haya menasa, specialmente di criminalidad organisa’. Pero no ta menciona e cantidad di sucesonan den resto di Reino. E asunto tampoco a haya un mencion cerca secretario di estado Raymond Knops, ken den nomber di minister di media, Slob, a contesta pregunta por escrito di parlamento Hulandes preocupa pa e limitacion di libertad di prensa na Aruba y Corsou. Knops no a haya necesario pa inclui den e condicionnan pa sosten financiero un proteccion pa libertad di prensa.

Placa Hulandes pa proteccion di prensa
 Durante e mesa rondo di minister na WFPC a yega na un declaracion pa protege libertad di prensa y di periodista na nivel mundial. Hulanda a reserva 7 miyon euro pa esaki. E idea ta pa periodistanan bao menasa por haya luga pa sconde tambe cu e programa Shelter City.

Proximo aña, UNESCO, financia cu placa Hulandes, lo duna training na polis y otro personal di seguridad tocante proteccion di periodista. Na Aruba, segun Ret Karibense, diferente medionan di comunicacion ta indica cu polis mes ta forma un problema. “No tur hende cerca polis ta trata periodista bon; tin polis ta comporta masha malo, nan ta bringa y haci guera cu nos. Cerca cuerpo di polis no ta scucha nos. Vocero di polis ta slow y ta tuma parti pa nan periodistanan faborito mientras no ta informa e otronan”, segun Edmond Croes, director di entre otro Solo di Pueblo, a declara na Ret Karibense.