Desde algun siman atras, coincidiendo cu e confirmacion di e presencia di e variantenan nobo di Covid-19 na Aruba, por a nota un tendencia di aumento di hospitalisacion pa e virus SARS-CoV-2.

Luna pasa, Bon Dia Aruba a reporta tocante un aumento den cantidad di hospitalisacion relaciona cu Covid-19. Na februari, e cantidad mas halto di hospitalisacion tabata 27 persona. Awo por nota cu ya esaki a aumenta, poco poco, na 36, segun resumen diario di Departamento di Salubridad Publico, DVG. Di e 36 persona hospitalisa, 11 ta den Unidad di Cuido Intensivo mientras 25 ta isola riba unidad general di Covid.

Bon Dia Aruba a tuma contacto cu DVG, pa puntra si e aumento den cantidad di hospitalisacion ta relaciona cu e variantenan nobo cu a identifica na Aruba, manera esun Britanico, esun di Sur Africa, y esun di Mexico. Jurette Croes, PR di e departamento, a splica cu mirando cu Aruba no tin su propio laboratorio, ta haci dificil pa controla si e aumento den cantidad di hospitalisacion ta relaciona cu e variantenan. “Nos no por defini precies cua ta e variantenan cu e persona cu ta wordo hospitalisa por tin.” Nan ta studiando e situacion si door di manda muestra Hulanda, y aki por a nota cu tin un gran cantidad di caso di e variante conoci como Britanico na Aruba.

Aumento drastico di variante Britanico

Segun DVG, instituto di salubridad publico di Hulanda, RIVM a identifica 47 caso mas di e variante Britanico na Aruba. “Nos a ripara e aumento di variante Britanico ta drastico”, Croes a splica. Tambe a identifica e prome 2 caso di e variante di Sur Africa. Pues na Aruba un total di 97 caso di e variante di Reino Uni a keda identifica, 2 di Sur Africa, 8 Mexicano, 3 di California y 1 caso di e variante di Brazil. “Un mensahe ta bay na comunidad pa sea extra cauteloso y sigui cumpli firmemente cu e reglanan di distanciamento social, usa tapaboca y laba man frecuentemente. E variantenan aki ta mas agresivo y ta acelera e proceso di infeccion cu por causa problemanan serio di salud y compromete e capacidad di cuido na Hospital”, DVG a indica den un comunicado di prensa. “Na momento cu bo sinti cu bo tin sintoma, no keda cana rond, bay haci test y isola bo mes pa no sigui plama e virus.”

Comunidad negligente
 “For di mas o menos dos siman, nos ta mirando cu e cantidad di test cu ta wordo haci ta basta stabiel – nos no ta mira aumento den test. Pero loke si nos ta mira ta aumenta ta e positivity rate”, Croes a comenta. “Esaki un scenario cu nos a mira caba den pasado, cu ta indica cu hopi hende no ta bezig ta test.”

E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 700 test. ‘Postivity rate’ entre nos residentenan ta 24%.

Na momento cu e positivity rate ta halto pero e cantidad di test ta keda mescos, esey ta duna indicacion cu hende no ta haci test, segun Croes. “Y eyfo tin transmision ta tumando luga y hende no ta haciendo test. Esaki ta conduci na aumento drastico, unda bo no por ta sigur di kico ta broei pafo, cu bo no tin bista riba dje.”

Esaki ta nifica un situacion unda tin cantidad di hende cu sintoma cu no ta wordo diagnostica, pa loke DVG ta pronostica cu tin na caminda un aumento drastico den caso activo, na momento cu mas hende bay haci test.

“Nos ta mirando cu comunidad ta neglishando e covid”, Croes a lamenta. “Nos no sa sigur si esaki tin di haci cu e vacunacion, cu hende ta pensa cu pasobra a cuminsa cu campaña di vacunacion, cu nan ta mas proteha awo. Locual no ta e caso, pasobra si bo a ricibi e prome dosis so, bo no ta completamente proteha, bo por haya covid ainda. Y na momento cu bo tin e di dos vacuna ricibi, ta tarda mas o menos dos siman pa bo sistema inmunologico ta suficientemente opgewekt cu bo por bisa bo ta 75% proteha… kiermen ainda nos ta den un posicion hopi vulnerabel.”

Pa e motibo aki, DVG ta keda insisti pa comunidad pa haci test na momento cu ta presenta cualkier sintoma. Ta reitera cu no por distingui sintoma di griep di esun di Covid, y pa e motibo aki ta necesario pa tur hende haci test, pa evita cu ta contagia mas persona.

Den otro noticia relaciona cu Covid-19, segun resumen di DVG ayera, a registra 61 caso nobo, di cual 2 no ta residente. 20 persona a recupera. E cantidad di caso activo a keda na 308. Lamentablemente a registra otro fayecido, pa loke e cantidad di morto pa Covid-19 ta aumenta na 80.