Manera Bon Dia Aruba a publica den su edicion di ayera dialuna, den fin di siman ultimo redactor a core rond y a bin topa varios sitio unda hendenan ta benta sushi di manera ilegal riba e caminda, pa esaki, a bay investiga cuanto ta e costo cu un ciudadano mester paga pa por deshaci di desperdicio.

Ta asina cu ta tira diferente sorto di materia ta ser laga atras den area di Cascabel Airfield na San Nicolas e fin di siman ultimo sin mira e consecuencianan y peliger cu esaki tin tanto pa naturalesa como pa e bestianan cu ta cana rond ey banda.

E camindanan aki ta uno cu tanto local como turista ta usa pa asina yega Grapefield of pa pasa un rato den naturalesa, como tambe ta un area unda cu tin hopi bestia ta cana rond.

No ta conoci si ta pa motibo cu a cera e dump di Parkietenbos of cu den e area aki cu tin persona ta biba y ta djis benta e sushi mirando cu ta cerca y cu no mester bay benta esaki na unda e mester bent’e legalmente. Hopi di e material aki no por disolve cu e naturalesa manera mata y carton, nan ta keda forma un peliger tanto pa medio ambiente y hende mes. Tin entre otro asbest, zink, paña, coy hunga bieu, cosnan di auto, entre otro, pa varios biaha diferente luga a pega na candela pa asina baha e cantidad di sushi, pero mester bin un solucion structural pa e sitio aki.

Waste redirection ta un campaña cu minister di Medio Ambiente Ursell Arends a bin cuney aunke e ta purbando di haci su best, e resultado ta otro. Ademas di esey, por a compronde cu tin solamente 5 ploeg cu ta dedica pa haci limpi tur e luganan rond di Aruba segun meldingnan cu ta drenta na Bureau City Inspector, loke ta nifica cu mester di mas hende pa por haci e trabou aki.

Coleccion di sushi residencial y comercial ta sigui normal hasta a bin cu hunto cu tur partners cu ta colaborando, un parke pa separacion di desperdicio cu ta den rotacion den cada districto pa yuda hogarnan cu e transicion desde ceramento di Parkietenbos.

Cu Baki den Bario, ta purbando di stimula habitonan di separacion di desperdicio a base di tipo, grupo, of producto den hogarnan. Baki den Bario no ta habri pa desperdicio comercial, “solamente pa residencial” y solamente pa e siguiente producto of materialnan: metalnan, e-waste, greenwaste, carton, taira, azeta di cushina, desperdicio di construccion reciclabel y desperdicio mescla.

Den 2023, un total di 4998 vehiculo a trece nan desperdicio na e campaña di Baki den Bario, mientras pa dia 23 di maart e campaña aki ta bay ta presente na San Nicolas na e veld dilanti Pitstop/BENU Pharmacy, pa dia 20 di april ta bay back na Noord, na e veld di Bubali y 25 di mei na parkinglot Nadi Croes & Crismo Angela di Santa Cruz, tur di nan for di 7or di mainta te cu 11or di mainta segun loke minister Arends a anuncia recientemente.

Si tin algun articulonan cu ta considera cu por ser reusa, Fundacion Pa Nos Comunidad ta acepta donacion.

Cu esaki, no solamente kier mustra cu un solucion t’ey y no djis bay benta sushi un caminda leu unda algun instancia por wak y duna boet, aunke esey ta e caminda mas facil pa cierto ciudadanonan cu ta susha e isla.

Tambe, un di motibonan di pakico esaki ta sucede por ta debi na e prijsnan di barinan cu no ta accesibel pa tur hende, como por ehemplo, EcoTech ta maneha diferente prijsnan pa huur baki pa benta desperdicio afo, un baki grandi su prijs ta di 645 florin pa cinco dia, pero den dje no ta permiti pa tira desperdicionan di construccion, pa esey mester usa un otro tipo di baki cu tin un costo di 1050 florin, prijsnan cu no tur ciudadano ta dispone di dje y esey por ta un di e motibonan di pakico e ciudadanonan ta dicidi di benta sushi rond di e isla.

Serlimar na e momentonan aki no ta huur bakinan pa e desperdicionan aki ya cu nan ta den proceso di ahustacion di prijsnan y te ainda no ta conoci kico ta bay ta e tarifanan nobo pa bakinan grandi, mientras tanto, nan tin disponibel e servicio normal di recoge sushi den tur districto.

Un solucion cu por yuda tambe ta e opcion di e plataforma FIXI, ora ciudadanonan ta topa cu dump ilegal riba caminda por meld esaki riba e plataforma di manera gratis.

Pa por haci un rapport riba FIXI ciudadanonan mester conta cu un smartphone pa por download e aplicacion gratis riba nan telefon via App Store of Google Play y crea un perfil di usuario, den otro caso, tambe por hacie cu un computer riba e website: www.fixi.aw

Proceso di raporta ta facil:

1) Observa un situacion

2) Saca potret

3) Skirbi un reportahe cortico di e situacion 4)

Manda e reportahe 5) Bureau City Inspector (BCI) instancia encarga pa dirigi e aplicacion ta ricibi y redirigi e rapport pa instancia concerni si ta necesario.

Si ta observa cualkier di lo siguiente, lo bo por raporta esaki cu Fixi:

 Dump ilegal of hende ta deshaci di sushi ilegalmente

 Ta deshaci awa preto riba tereno publico of den dam

 Hende ta deshaci di kimico riba tereno publico

 Ta sospecha individual of compania di deshaci di kimico peligroso

(venenoso) riba tereno publico, of riba tereno priva sin tin permiso.

 Wacharaca di auto riba tereno publico