Redaccion di Bon Dia Aruba a ricibi comentario di un ciudadano kende ta basta disgusta pa e manera di traha di Camara di Comercio di Aruba. Segun e ciudadano a conta, Camara di Comercio a suspende servicio pa falta di pago di un factura cu no a vence ainda.
E ciudadano ta cuestiona cu falta di pago di un factura cu no a vence a resulta den suspension di servicio, pa cual e ciudadano no por a registra cambio den su compania, cual pa ley e ta obliga di haci na tempo.
Segun articulo 15, inciso 1 di Handelsregisterverordening, e pago di Jaarlijkse Bijdrage di e aña coriente mester ta paga pa mas tarda 15 di maart di e aña en cuestion. E ciudadano a conta cu el a paga e suma pa su compania te cu 2022, cual a transferi na cuenta di Camara di Comercio. Sinembargo, si ta maneha e periodo di pago comercial usual di un luna, e factura di 2023 no a vence ainda sino te 30 dia despues di e dagtekening, cual tabata dia 9 di februari – cual lo nifica cu e factura ta vence dia 9 di februari proximo, algo cu e ciudadano a indica ta menciona den e factura cu el a ricibi di Camara di Comercio.
Ademas, e hecho cu e no por a haya servicio riba e website pa registra e cambio den su negoshi ta contra bienestar general di gobierno. Den e caso specifico aki, e ciudadano a conta cu el a purba varios biaha pa haci un cita pa splica e complehidad di e materia unda tabatin “aandelen ruil hunto cu cambio di director”.
Eventualmente el a logra haya un cita na Camara di Comercio y eynan mes el a yega e formulario pa e cambio, “pa asina mi ta sigur cu tur cos lo bay bon.” Pa su sorpresa, el a haya cu pa motibo di un eror di un empleado a resulta cu mester bolbe yena e formulario y bolbe upload tur documentacion. Esaki despues cu ya tabatin varios biaha ta purba di haci esaki. E ciudadano a expresa asina su malcontento cu e website di Camara di Comercio.
Tambe a critica cu e unico manera pa haya un cobransa of recordatorio ta pa esnan registra den KvK habri e website y login. Lo ta mas productivo si por manda comunicacion via e-mail of post riba e adres di e compania cu KvK tin registra den su sistema. E cambio aki ta di interes ya cu comercio ta depende di informacion actual, segun e ciudadano.
Bon Dia Aruba a tuma contacto cu Camara di Comercio pa pidi si Camara di Comercio por splica lectornan di Bon Dia Aruba kico ta e proceder pa cu cobransa cu ta caduca cierto fecha, na ki momento e falta di pago ta resulta den suspension di servicio, y con ta maneha casonan di eror di empleadonan di KvK.
Te ciere di e edicion aki no a ricibi contesta di KvK.
