Na diferente area na Aruba tin un falta di iluminacion riba e drempelnan riba caminda cual den anochi por causa un peliger pa trafico.
Director di DOW Marlon Croes ta informa na Bon dia Aruba cu berdad tin un problema cu e iluminacion di e drempelnan ariba caminda y cu DOW ta consciente di esaki. Tambe sr. Croes ta splica cu e lijm a caba cu nan ta uza pa pega e luznan aki, miho conoci como wowo di pushi pa ilumina e drempelnan. E ta bisa cu a manda busca tur material cu ta necesario pa drecha e problema aki mas lihe posibel. Tin e borchinan di trafico si cu ta reflecta luz, avisando cu bo ta yegando un drempel riba caminda.
Sr. Croes ta bisa pa motibo di hopi yobida den e ultimo dianan aki e prioridad di DOW ta pa tapa buraconan riba caminda y drecha camindanan di santo. E ta anuncia cu na comienso di aña 2017 DOW lo cuminsa pone y instala mas di e luznan riba e drempelnan pa asina percura cu tin un miho iluminacion.
