(NLTimes) – Personanan cu cancer di pecho ta cay victima di discriminacion pa motibo cu operacionnan follow-up despues di un reconstruccion inicial no ta ser reembolsa, segun expertonan legal cu a papia cu NOS. Nan ta kere cu e Minister di Salud Ernst Kuipers mester bolbe evalua e problema aki.
Seguronan di salud Hulandes ta traha riba un standard cu ta reembolsa operacion di reconstruccion despues di cancer cu excepcion di cancer di pecho. Prome e dokternan mester aplica pa ricibi aprobacion pa e operacion despues di e reconstruccion inicial di e pechonan amputa y e aplicacionnan aki hopi biaha ta ser rechasa.
Seguronan di Salud a reuni riba dialuna pa tercer biaha cu e Dutch Society for Plastic Surgery (NVPC), despues di reportahenan tocante falta di igualdad den e reembolso entre pashentnan di cancer. Cancer di pecho ta e cancer mas comun den hende muhe, cu un den cada 7 ricibiendo un diagnosis. Ana pasa, 15,500 persona na Hulanda a ricibi e diagnosis aki y otro 2,400 hende muhe tabata den un posibel etapa precancer y bao tratamento. Mas o menos un tercer parti di pashentnan di cancer di pecho ta haci e amputacion di un of ambos pecho. Tambe tin hende muhe cu un predisposicion genetico cu ta opta pa amputa e pecho como medida di prevencion.
Mientras cu e operacionnan aki normalmente ta ser reembolsa, e proceduranan follow-up pa problemanan manera dolor, mal posicion di e prothesis of iregularidadnan notabel entre e pechonan no ta automaticamente cubri. Ciruhanonan mester aplica di antemano na e seguronan di salud pa e operacionnan adicional aki, hopi biaha incluyendo potret di e pecho. E seguro despues ta usa criterio specifico pa determina si e operacion lo ser reembolsa, enfocando riba e localidad y tamano di e problema. Reconstruccionnan despues di otro tiponan di cancer y nan operacionnan follow-up si ta ser reembolsa sin e necesidad di aprobacion y diferencia aki ta ser mira como descriminatorio pa expertonan legal.
Theo Hoogiemstra, un experto di ley di salud y proteccion di data a argumenta cu no tin base legal ni etico pa trata reconstruccion di pecho post-cancer diferente cu otro reconstruccionnan. Tambe e ta considera problematico cu e seguronan di salud ta pidi potret di e pecho pa evaluacionnan, enfatisando e potencial den violacion di proteccion di data. “Con ta posibel cu bo ta depende riba e opinion medico pa tur otro caso di recontruccion, pero no ora ta trata reconstruccion pa hende muhe? Esaki ta descriminacion, no solamente contra hende muhe sino tambe en general,” el a expresa.
