ATIA ta duna un splicacion awor di e falta di mas tanto fruta y berdura den diferente supermercadonan na Aruba. Un barco grandi di e compania King Ocean a enfrenta problema siman pasa.
“E barco concerni a haya problema mecanico y consecuentemente a desvia pa Jamaica caminda e barco aki a wordo repara. E problema cu esaki a causa pa Aruba tawata grandi, causando cu basta producto y, mas importante, fruta y berdura no tawata disponibel na Aruba. Aruba ta depende hopi ariba e barco di King Ocean pa mayoria di comestibel y mercancia cu ta drenta Aruba, y e incidente cu e barco aki a mustra e consecuencia cu restraso of desviacion tin ariba economia di nos isla”, segun ATIA, representando e sector comercial y industrial local.
Nan a wordo informa siman pasa y A a reacciona mesora riba e notificacion aki, tumando contacto directo cu King Ocean pa asina ricibi detayenan di e problemanan andando cu e barco. “King Ocean na su turno a reacciona riba e carta di ATIA y a tene ATIA altanto di e situacion. King Ocean a reitera cu nan tambe ta wak e urgencia di e situacion y nan lo hasi nan maximo esfuerso pa e containernan yega Aruba lo mas pronto posibel.”
E organisacion ta comenta tambe: “Lamentablemente ATIA a bin ta teme un situacion asina aki pa algun tempo caba. Caminda Aruba ta depende pa mayoria di comestible riba un liña di carga, y si esaki pa cualkier motibo fuera di nan control haya problema, Aruba su comerciantenan, consumidornan, sector turistico y economia ta sufri consecuencia grave. ATIA lo a prefera pa tin mas opcionan den e area aki pa asina disminui e efecto cu Aruba ta keda sin comestibel y cierto mercancia.”
Nan ta bisa cu nan ta consciente cu esaki no ta facil pa logra. Pero nan ta keda haci nan esfuerso pa haci Aruba mas atractivo pa liñanan di cargo tuma ruta pa nos isla. E organisacion ta bisa cu nan ta ‘intermediando tambe entre e liñanan di cargo, ASTEC y demas stakeholder nan pa mehoracion di servicio y soluciona algun reto cu ta afecta e operacion eficiente di nos waf’.
